Fëmijët në situatë rruge – Veliaj: Qytetarët të raportojnë! Lu: Të tregohet më shumë vëmendje

Kryebashkiaku Erion Veliaj u bëri apel qytetarëve që të tregojnë vëmendje të veçantë ndaj fëmijëve në situatë rruge, duke raportuar rastet me të cilat përballen. Në Ditën Ndërkombëtare për Fëmijët në Situatë Rruge,  Veliaj theksoi se nuk është zgjidhje dhënia e lëmoshës për këtë kategori.

 “Një shprehje anglisht thotë, duhet një fshat i tërë për të rritur një fëmijë. Kjo do të thotë jo vetëm ministria, jo vetëm bashkia, jo vetëm OJF-të, jo vetëm qendrat sociale, por kushdo qytetar që shikon një fëmijë në situatë rruge ka misionin e qytetarit që ta raportojë. Nëse dikush mendon se duke i dhënë 20 lekë në semafor ka kryer detyrën e vet qytetare, në fakt sapo i ka vënë çmim jetës dhe çmimin e trafikimit të atij fëmije. Në disa raste situatat janë ekstreme, ku prindërit e këtyre fëmijëve na duhet t’i procedojmë edhe penalisht”.

I pranishëm në aktivitet, ambasadori amerikan në vendin tonë, Donald Lu, theksoi se në një kohë që Shqipëria afrohet edhe më shumë me Bashkimin Evropian, duhet të tregohet një vëmendje e shtuar edhe për fëmijët në vështirësi.

“Shqipëria për shumë vite ka pasur një problem, një problem për të mbështetur fëmijët e saj në rrugë. Por ky është një problem që Shqipëria me mbështetjen e partnerëve duhet të jetë e aftë ta zgjidhë. Nuk keni 11 milionë fëmijë për t’u kujdesur, keni vetëm disa qindra. Vendi vazhdon t’i afrohet anëtarësimit në BE, shpresojmë që Shqipëria të mund të kujtojë fëmijët e saj. Ata kanë të drejtë të shkojnë në shkollë, ata kanë të drejtë të mos jenë të uritur, ata kanë të drejtë të mbrohen nga abuzimi. Siç ma mësuan fëmijët e mi, jam gati të mbledh monedhat e mia për të mbështetur UNICEF-in dhe OJQ-të që mbështesin fëmijët e Shqipërisë. Shpresoj se do ta bëjmë bashkë këtë”.

Megjithëse është bërë shumë në drejtim të strehimit dhe punësimit të kësaj kategorie, sërish problematika është e lartë dhe janë qindra fëmijë në situatë rruge.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.