Ferma ku turistët shkojnë për të jetuar si kaubojs
Jeta e kaubojsit, ndonëse nuk është aq emocionuese sa dikush mund të mendojë prej filmave, është gjithsesi shumë e kënaqshme. Të kalërosh duke parë diellin të lindë, ushqimi më i mirë me produkte natyrale mishi dhe bulmeti, si edhe përfundimi i ditës pranë zjarrit duke dëgjuar një kaubojs me kitare, ia shtojnë kënaqësinë kësaj jete.
Megjithatë, nëse nuk mund të jetosh si kaubojs çdo ditë, mund ta bësh këtë gjë të paktën për pushime.
Udhëtarë nga e gjithë bota shkojnë në fermën Mill Creek në Kolorado, për të përjetuar eksperiencën e një “lopçari” të vërtetë.
Pronarët e fermës thonë se shumica e vizitorëve tërhiqen kryesisht nga kuajt, ndërsa të tjerët nga legjendat dhe mitet e vjetra “western”.
“Është një mënyrë jetesë që e kanë parë vetëm nëpër filma dhe janë të magjepsur pas saj”, thotë vajza e pronarëve. Turistët flenë në dhomat me dekorin e vjetër të asaj kohe ose parkojnë trailerin e tyre në fusha. Ata vijnë për t’u martuar në kishën që ndodhet brenda fermës, ose thjesht për të kalëruar dhe eksploruar natyrën në qiejt e hapur.
Për më të vegjëlit, ferma është një kënd lojërash gjigand. Ata provojnë të gjuajnë me hark, lidhin me litar blloqe kashte apo luajnë mini-golf. Edhe nëse nuk mund të gjuajnë me pistoleta të vërteta si kaubojsët, ato mund të provojnë pistoletat me patate, gjatë kohës që të rritur gjuajnë me piatel apo provojnë nishanin në poligonin e qitjes.
Ata që kanë më tepër talent e përdorin fermën si kamp bazë dhe shkojnë të gjuajnë drerë dhe kafshë të tjera në Pylli Kombëtar të Rio Grandes. Të tjerë peshkojnë në ujërat e ftohta në lumit Rio Grande.
Në mbrëmje të gjithë mblidhen në Sallonin Lopa e Çmendur, ku darka mund të jetë biftek, misër, dhe gjithçka tjetër që ferma ka për të ofruar.
Ferma organizon gjithashtu mbrëmje kërcimi western, barbekju dhe gara gatimi. Në rast lodhjeje, ujërat termale janë pranë, së bashku me një sërë shërbimesh spa dhe masazhi.
Në përgjithësi zona është e pasur me larmi, ku në distanca fare të shkurtra mund të hasësh pyje alpine, moçale, shkretëtira, duna, lumenj dhe përronj. Ndaj është e garantuar se do të doni të bëni një tjetër xhiro para se të largoheni e të varni çizmet në mur.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.