Fermerët reagojnë ndaj TVSH-së – Protestojnë duke derdhur qumështin në rrugë

Fermerët e Lushnjës në formë proteste ndaj ndryshimeve fiskale të bëra në fundvit kanë derdhur qumështin në rrugë, duke kërkuar kështu reflektim nga ana e Ministrisë së Financave.

Pakënaqësia e tyre lidhet me ndryshimin që iu bë masës së rimbursimit në fund të vitit që lamë pas nga 20 për qind në 6 për qind, që në thelb prek më së shumti fabrikat të cilat nuk kanë interes të blejnë produkte të bulmetit apo fruta perime nga fermerët shqiptarë, pasi i shesin ato me TVSH 20 për qind, ndërsa rimbursohen për blerjet e bëra nga fermerët në masën 6 për qind.

Ky ndryshim është përkthyer si një kosto prej 14 për qind për industrinë përpunuese vendase.  Shqetësimi është ngritur vazhdimisht nga grupet e interesit përgjatë këtyre muajve, të cilët kanë argumentuar se kjo masë do të sjellë ulje të fuqisë blerëse, rritje të importeve për shkak të uljes së konkurrueshmërisë së prodhimit vendas dhe uljen e prodhimit industrial, ndërsa llogarisin një kosto totale prej 100 milionë eurosh në vit.

Rreth një javë më parë, pas një takimi të zhvilluar me ministrin e Bujqësisë Bledi Çuçi, kreu i shoqatës Albanian Food Industry, Alban Zusi, vendosi si afat për rishikimin e këtij vendimi 14 Marsin.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.