Fermerët, “të paqendrueshëm” në sigurime – I “nënshtroi” pandemia, numri i kontribuuesve më i ulët se 2019-ta!

Fermerët tregojnë së janë të paqendrushëm në derdhjen e sigurimeve shoqërore dhe shëndetësore, për të mos thënë që kanë bërë hapa pas. Të dhënat zyrtare të Institutit të Sigurimeve Shoqërore të përpunuara nga SCAN TV, tregojnë se gjatë vitit 2021, rezultojnë në skemën e kontributeve 58.091 të vetëpunësuar në bujqësi.

Kjo shifër është optimiste nëse e krahasojmë me vitin 2020 kur dhe ishte kulmi i pandemisë, pasi numri i fermerëve shtesë të përfshirë në skemë është 11.348 të vetëpunësuar. Por po të hedhim vështrimin më larg, vihet re se 2020-ta është viti më i dobët në këtë drejtim për shkak të pandemisë COVID 19 ku mijëra fermerë kanë dalë nga skema për shkak ndoshta të pamundësisë ekonomike për të derdhur kontributet. Ndërkohë që viti i parakrizës 2019 rezulton si viti më i mirë me mbi 61.500 fermerë në skemë.

Megjithë rritjen e numrit të të vetëpunësuarve në bujqësi gjatë 2021-shit sërish shifra është më e ulët se në periudhën 2017-2019.  Duket se vitin që lam pas ka shërbyer si nxitje edhe skema e naftës falas në bujqësi, ku për të përfituar shumë fermerë janë formalizuar dhe rrjedhimisht janë futur edhe në skemën e sigurimeve shoqërore dhe shëndetësore, gjë që u garanton jo vetëm pensionin në të ardhmen por edhe shërbime të tjera.

Në total nga të vetëpunësuarit në bujqësi janë mbledhur 2 miliardë lekë gjatë 2021, dhe 72.8 për qind e kontribuuesve janë të shtrirë në zonat fushore ku dhe bujqësia intensive është më e zhvilluar. Fieri është rajoni me numrin më të lartë të fermerëve të formalizuar.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.