Fermerët të “përçarë” – Vetëm 65 SHBB, qëndrojnë larg fondeve dhe lehtësirave fiskale
Vetëm 65 Shoqëri të Bashkëpunimit Bujqësor funksionojnë në të gjithë vendin, ndërkohë që janë plot 36 mijë fermerë të regjistruar dhe që disponojnë një Nipt. Këto bashkime fermerësh përbëhen në total nga 600 anëtarë.
Megjithëse ligji funksionon prej kohësh, duket se fermerët hezitojnë që të bashkohen, gjë që sjell pasoja në përthithjen e fondeve qoftë nga Skemat Kombëtare, por edhe nga ato të Bashkimit Europian.
Qeveria por edhe kriteret e vendosura në këto skema i japin prioritet atyre fermerëve që janë të bashkuar, duke bërë që të kenë më shumë tokë në dispozicion dhe më shumë prodhim. Fragmentarizimi i bujqësisë është një ndër shkaqet kryesore për raportin e keq midis import-eksporteve.
Por përveç aksesit në fonde, për fermerët e bashkuar parashikohen edhe lehtësi të tjera. Ministri i Bujqësisë, Niko Peleshi ka paralajmëruar heqjen e TVSH-së për Shoqëritë e Bashkëpunimit Bujqësor, gjë që do të ulë ndjeshëm kostot e prodhimit.
Gjithashtu, përmes bashkimit fermerët do të kenë mundësi edhe të racionalizojnë të gjithë mjetet e prodhimit dhe financimit dhe të hyjnë në një sistem, duke prodhuar gjërat e duhura me volume të mëdha si dhe të kenë treg të sigurt për shitjen e produkteve të tyre.
Për financimin në bujqësi janë vënë në dispozicion 20 milion euro nga skemat kombëtare dhe 94 milion euro përmes programit IPARD.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.