“Ferragosto” e gjen Italinë me mungesa punëtorësh sezonalë në sektorin e Turizmit
Në mesin e sezonit turistik, bizneset italiane që ofrojnë shërbime në sektorin e hoteleri-turizmit japin alarmin për mungesa në numrin e punëtorëve sezonalë.
Vetëm në qytetin e Jesolos, i cili ndodhet pranë Venecias dhe laget nga deti Adriatik, vjen kërkesa për 500 punëtorë, shumica për pozicione si picabërës, baristë, kamarierë, apo shitës.
Për momentin, Jesolo po ia del duke punësuar miq e të afërm, si edhe duke bërë turne 10-12 orëshe. Ky qytet punëson mbi 10 mijë njerëz, me 400 hotelet, 10 mijë apartamentet, kampingjet, rezidencat, fshatrat dhe rreth 2 mijë aktivitetet tregtare.
Problemi duket se është konkurrenca e fortë për të gjetur krah pune emigrantë, të cilët mund të mos jenë gjithnjë profesionistë, por kanë një çmim më të lirë.
“Mungojnë efektivisht qindra punëtorë në sektorë të ndryshëm dhe nuk kuptohet pse, përballë papunësisë së madhe që kemi në Veneto dhe në Veri, e jo më në Jug të vendit. Në nivel burokratik kemi shumë vështirësi në marrjen në punë në përiudhat kur punëtorët duhen më tepër. Për këtë, sipërmarrësit rregullohen me familjarë dhe përpiqen të mbulojnë aq sa munden”, thotë Angelo Faloppa, presidenti i Confcommercio.
Kurrë nuk kishin munguar në mes të sezonit picabërësit e as kamarierët. Sot po punësohen shuymë qytetarë të Bangladeshit, jo vetëm si larës pjatash, apo si ndihmës në kuzhinë, por edhe në sallë.
Skuadra të tëra me kamerierë vijnë nga Shqipëria, Rumania, Republika Çeke, apo Sllovakia. Tashmë nuk duken më studentë italianë që punojnë verës për të paguar universitetin. Të vetmit që punojnë janë vendasit, që sipas traditës nga Maji në Shtator janë gjithmonë të pranishëm, si pronarë, menaxherë apo si punonjës.
Kërkesa të tilla për krah pune vijnë nga e gjithë Italia, ndaj shumë punëdhënës i janë drejtuar edhe portaleve online si lavoroturismo. Qeveria ka rezervuar 17 mijë kuota për punëtorë sezonalë nga vendet jashtë BE-së, mes tyre dhe Shqipëria.
Mungesat e punëtorëve në sektorin e turizmit kanë prekur jo vetëm Italinë, por edhe një pjesë të mirë të Bashkimit Europian. Kroacia raportoi këtë vit se i mungojnë 2700 punëtorë në këtë sektor, pavarësisht 171 mijë njerëzve të papunë.
Mungesa për punonjës sezonalë duket se mund t’i atribuohet vetëm tejkalimit të krizës ekonomike dhe rritjes së mirëqenies për shumë familje europiane.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.