Festat në qendrat sociale – Bashkia e Tiranës dhe AMF, drekë për njerëzit në nevojë
Autoriteti i Mbikëqyrjes Financiare iu bashkua thirrjes së Bashkisë së Tiranës, që në prag të festave të fundvitit, të sjellë pak gëzim e dashuri për shtresat më në nevojë të shoqërisë. Kryebashkiaku, Erion Veliaj dhe kryetari i AMF-së, Ervin Koçi, shërbyen një drekë festive të gjithë njerëzve në nevojë, kryesisht të moshuar, që frekuentojnë Qendrën Sociale të Bashkisë së Tiranës në Bulevardin “Zogu I”.
“Janë të rralla ato institucione të cilat thonë, nuk do të mendojmë vetëm për veten tonë, por për ne, pjesë e organizimit të fundvitit, do të jetë edhe një drekë, një vakt i ofruar për qendrat tona sociale. Ndaj, për këtë arsye të falenderoj me gjithë zemër. Arsyeja pse e them këtë është se asnjë njeri nuk ia del dot i vetëm. Një kryetar, një bashki, një staf sado të bëjë, qyteti është i stërmadh, nevoja është e stërmadhe, projektet janë shumë të komplikuara, do të thotë se asnjë s’ia del dot vetëm. Kjo është arsyeja pse për çfarëdo lloj projekti na duhet ndihmë nga të gjithë”.
Koçi, vlerësoi punën e bërë nga Bashkia e Tiranës në mbështetje të shtresave në nevojë dhe për moshën e tretë.
“Punonjësit në institucionin që unë drejtoj të AMF kanë kontribuar të gjithë modestisht për të qenë pranë jush në këto ditë festash. E ndjej për detyrim për të qenë pranë jush dhe besoj se ju meritoni më shumë. Bashkia po bën shumë dhe kam bindjen se edhe më shumë do bëhet”, tha Koçi. Ai theksoi se në këto ditë festash, të gjithë duhet të jenë më pranë njerëzve që janë në vështirësi.
Ky është viti i tretë, që me rastin e festave të fundvitit, Bashkia e Tiranës shtron drekë për të moshuarit dhe njerëzit në nevojë që frekuentojnë mensat sociale që janë ngritur në kryeqytet.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.