Festimet për ditën e verës – Muzikë dhe qytetarë të shumtë, por pak xhiro për bizneset
Me qindra qytetarë i janë drejtuar Sheshit Skënderbej dhe kodrave të Liqenit në kryeqytet për të festuar ditën e verës.
Edhe pse kjo festë është festuar historikisht në qytetin e Elbasanit vitet e fundit duket se vëmendjen po e rrëmben Tirana.
Shitësit ambulantë kanë pritshmëri të larta në këtë ditë për të shitur sa më shumë nga produktet e tyre.
Por nga ana tjetër qytetarët edhe pse kanë dalë në shesh për të festuar nuk janë të pritur për të shpenzuar para.
Ballokumja është ëmbëlsira tradicionale që identifikon këtë festë. Nëse në ditë normal një ëmbëlsirë e tillë kushton 50 lekë tregtarët kanë menduar që të përfitojnë në 14 mars duke e shitur atë për 70 lekë.
Bashkia e Tiranës organizoi një sërë aktivitetesh me rastin e ditës së verës. Ndërkohë që kryetari i bashkisë Erjon Veliaj bashkë me urimin për këtë festë ka rikthyer edhe një herë vëmendjen në debatin e ditës, atë të teatrit.
Sipas Veliajt çdo ndryshim shoqërohet me debate por që në fund të gjithë e mirëpresin.
Për të siguruar mbarëvajtjen e të gjitha aktiviteteve që nisën në orën 10.00 nga Bashkia e Tiranës është bërë edhe kufizimi i qarkullimit të automjeteve në akset kryesore që lidhen me Bulevardin dhe Sheshin Italia.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.