Fillimi i procesit të Maturës Shtetërore 2017, ministria e Arsimit: Monitorim i rreptë, çdo shkelje e evidentuar, procedim sipas ligjit
Ministria e Arsimit konfirmon se procesi i Maturës Shtetërore do të vijojë sipas kalendarit, pavarësisht ndryshimeve të ndodhura në drejtimin e institucionit. Nga ana tjetër, në një deklaratë për mediat, ministrja Mirela Karabina u shpreh se procesi do të monitorohet nga afër në mënyrë që të mos lejohet asnjë ndërhyrje apo deformim që mund të cënojë standardet e procesit.
“Sipas kalendarit të hartuar nga Komiteti i Maturës Shtetërore 2017 në Ministrinë e Arsimit dhe Sportit, do të vijojnë të zhvillohen të gjitha detyrimet që përmban Matura Shtetërore, që ka filluar nga vjeshta e vitit 2016 e në vijim, me miratimin e Rregullores dhe udhëzimeve që rregullojnë mbarëvajtjen e këtij procesi. Në vijim, ne do të monitorojmë nga afër çdo aspekt të këtij procesi duke mos lejuar asnjë ndërhyrje, apo deformim që mund të ndikojë në cënimin e standardeve të këtij procesi kaq të rëndësishëm dhe me ndikim të gjerë në opinionin publik. Duke e parë në këtë këndvështrim, në të gjithë takimet që kam zhvilluar iu është kërkuar që të gjithë aktorët pjesëmarrës në administrimin e Maturës Shtetërore 2017, të zbatojnë me rigorozitet të gjitha detyrimet e përcaktuara në paketën ligjore që rregullon afatet dhe rezultatet e provimeve” u shpreh ministrja.
Paralelisht,sipas ministres, është përcjellë edhe mesazhi që rikonfirmon se “çdo presion apo premtim i bërë maturantëve është i papranueshëm dhe të gjitha rastet e evidentuara do të jenë pjesë e procesit të verifikimit nga ana e Ministrisë së Arsimit dhe Sportit”. Çdo shkelje e evidentuar, sipas ministres, do të analizohet dhe çdo procedohet sipas legjislacionit në fuqi.
“Për çdo denoncim nga ana e prindërve, mësuesve apo maturantëve, është në dispozicion adresa e E-mail dhe numri i telefonit, si më poshtë: E-Mail: [email protected]/Telefon: +355 67 4474 900. Garantojmë se do të intensifikojmë monitorimin e çdo faze, për të vendosur standardet e kërkuara në administrimin dhe transparencën e gjithë këtij procesit, duke filluar nga organizimi deri tek vlerësimi i provimeve. Duke ju uruar edhe një herë suksese të gjithë Maturantëve, mbetemi të angazhuar në përmbushjen e të gjithë detyrimeve institucionale të Ministrisë së Arsimit dhe Sportit” thuhet në deklaratën e ministrisë së Arsimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.