Financat e vetëqeverisjes vendore – Komisioni parlamentar i Ekonomisë nis diskutimin e projektligjit
Projektligji “Për financat e vetëqeverisjes vendore”, pritet të nisë diskutimet në Komisionin e Ekonomisë ditën e hënë më 10 prill. Ky ligj ka si qëllim që të sigurojë financimin e njësive të vetëqeverisjes vendore në përputhje me parimet e autonomisë vendore.
Ligji synon një transparencë më të madhe, si dhe parashikueshmërinë e transfertave nga qeverisja qendrore për njësitë e vetëqeverisjes vendore. Në këtë mënyrë do të kemi edhe autonomi fiskale të qeverisjes vendore.
Kështu, vendorët do të kenë mundësi që të shpërndajnë burimet financiare të tyre në përputhje me prioritetet strategjike dhe nevojat e komunitetit. Kjo do të çonte në një zhvillim të qëndrueshëm ekonomik, social dhe territorial.
Sipas parashikimeve të hartuesve të projektligjit, njësitë e vetëqeverisjes vendore kanë të drejtë të vendosin tarifa për një shërbim që këto njësi ofrojnë apo për një të drejtë që iu jepet individëve, personave fizikë dhe/ose juridikë.
Njësitë e vetëqeverisjes vendore mund të vendosin tarifa vetëm për shërbimet publike, konsumi ose përfitimi i të cilave, në parim, është i matshëm për përdoruesit apo përfituesit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.