Financat marrin buxhetin më të madh – 63 milionë euro më shumë për të mbuluar sigurimet shoqërore
Ministria e Financave do të ketë buxhetin më të lartë ndër institucionet e tjera për vitin e ardhshëm me afro 68.5 miliardë lekë, me një rritje prej 8.6 miliardë lekësh apo 69.4 milionë eurosh në krahasim buxhetin e këtij viti. Referuar zërave të detajuar, se si do të ndahet ky fond në të gjitha funksionet që ka ky instucion, duket se pjesa më e madhe e tij, me rreth 51.6 miliardë lekë do të shkojë për sigurimet shoqërore, për të kryer pagesat për pensionet, shpenzimet për barrëlindje, invalidtitetin, kompensimet, etj.
Shpenzimet e buxhetit për këtë zë për vitin e ardhshëm janë në rritje të konsiderueshme me 7.8 miliardë lekë, apo 63 milionë euro, duke bërë që të jetë një kosto e madhe për buxhetin. Ndërkaq, një fond prej 6.2 miliardë lekësh në total do të shkojë për manaxhimin e e të ardhurave tatimore dhe doganore, me qëllim mirëadministrimin e tyre, reduktimin e informalitetit dhe realizimin e planit.
Nga ana tjetër, 3.3 miliardë lekë do të shkojnë për arsimin profesional, fond i cili është thuajse në të njëjtat nivele si një vit më parë, dhe 2.1 miliardë lekë janë akorduar për strehimin, me një shtesë prej 500 milionë lekësh krahasuar me këtë vit. Këto janë dhe zërat që marrin më shumë vëmendje në projektbuxhet, ndërsa për funksionet e tjera, shpenzimet janë më të moderuara.
Buxheti 2021 për Ministrinë e Financave
Viti 2020 59.9 miliardë lekë
Viti 2021 68.5 miliardë lekë
Shpenzimet për sigurimet shoqërore
Viti 2020 43.8 miliardë lekë
Viti 2021 51.6 miliardë lekë
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.