Financat publike në Britani – Fuqizohen për Nëntorin prej rritjes së të ardhurave nga taksat

Deficiti buxhetor në Britani ra gjatë muajit Nëntor, nxitur nga të ardhurat më të mëdha nga taksat,  duke ndihmuar ministrin e Financave Philip Hammond që të ruajë objektivat fiskalë. Ekonomia e Britanisë është ngadalësuar këtë vit, por financat publike zakonisht ndikohen me vonë, ndërsa inflacioni i lartë ka rritur disa lloje të  ardhurash nga taksat.

Huamarrja neto e sektorit publik, përjashtuar bankat e zotëruara nga shteti, ra në 8.7 miliardë paund muajin e kaluar, apo 1.9% më pak krahasuar me vitin 2016.  Huamarrja që prej fillimit të vitit financiar në muajin Prill arriti në një total prej 48.1 miliardë paund, tregon zyra e Statistikave, në rënie me 6.1% nga e njëjta periudhë një vit më parë dhe njëkohësisht norma më e ulët që prej vitit financiar 2007.

Objektivi i ri i Hammond për huamarrjen në 2017-2018 është shumë më i ulët se hendeku prej 58.3 miliardë paund që Zyra Përgjegjëse për Buxhetin projekton, ndërkohë që të ardhurat nga taksat kanë qenë më elastike se sa pritej, duke marrë parasysh edhe ngadalësimin e ekonomisë.  Të dhënat e fundit treguan një rënie të mprehtë të borxhit publik neto në 1.575 trilionë paund apo 76.7% të prodhimit vjetor, në rënie me 3% nga muaji i kaluar.

Zyra e Statistikave deklaroi se të ardhurat nga tatimi i kapitalit u rritën me 6.2% në Nëntor, ndërsa të ardhurat nga taksa për shitjen u rritën me 4.1% me bazë vjetore.  Të ardhurat nga taksa mbi korporatat mbeti e pa ndryshuar. Shpenzimet në interesat e borxhit u rritën me 15.6% deri më tani për vitin financiar, duke reflektuar rritjen e shpejtë të inflacionit, që ka shtuar kostot e bonove të indeksuara me inflacionin për Qeverinë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.