Financim për të papunët me ide biznesi – Programi nxit vetëpunësimin, kriteret për konkurrim
Në kushtet kur vendi po përballet me papunësi në rritje për shkak të situatës së krijuar nga COVID-19, ku shumë biznese kanë shkurtuar staf, qeveria ka vënë në dispozicion një program mbështetës për të papunët që duan të hapin biznesin e tyre. Përmes vendimit të publikuar në Fletoren Zyrtare, qeveria akordon 500 mijë lekë për individët e regjistruar si punëkërkues të papunë në zyrat e punësimit, të cilët kanë një ide të realizueshme biznesi dhe që i shërben ekonomisë.
Kështu në vendim thuhet se programi i vetëpunësimit është program njëvjeçar për mbështetjen e sipërmarrjeve të reja, nëpërmjet të cilit ofrohet trajnim për sipërmarrjen dhe zhvillimin e planeve të biznesit për aplikuesit dhe grant për përfituesit, përmes një procesi konkurrimi që do të zbatohet nga Agjencia Kombëtare e Punësimit dhe Aftësive. Për të aplikuar në këtë program, aplikuesi duhet që përveç se të rezultojë i papunë, të ketë një ide biznesi, e cila nuk është në kundërshtim me kriteret e konkurrueshmërisë, ku të bëjë përshkrimin e saj, rëndësinë; burimet e nevojshme për realizimin e biznesit; dhe vlerësimin e gjendjes së mjediseve ku do të zhvillohet biznesi.
Programi nuk mbulon blerjen e pasurive të patundshme; çdo shpenzim që nuk lidhet dhe nuk përfshihet në planin e biznesit të miratuar; shpenzimet e kryera përpara nënshkrimit të marrëveshjes së grantit; pagat, shpërblimet, qiranë dhe shpenzimet e tjera administrative. Afati për të aplikuar në program, për të gjithë punëkërkuesit e papunë, është 30 ditë kalendarike nga data e shpalljes së thirrjes.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.