Financim për ujërat e zeza – Kryebashkiaku Veliaj merr fonde nga qeveria japoneze
Agjencia Japoneze e Zhvillimit do të vazhdojë me financimin e projektit për kanalet e ujërave të zeza dhe sistemin e filtrimit të ujërave të zeza në Tiranë.
Lajmi është bërë me dije nga kryebashkiku Erion Veliaj gjatë një takimi me kreun e JICA) Shinichi Kitaoka.
“Agjencia Japoneze e Zhvillimit do të vazhdojë me financimin e projektit për kanalet e ujërave të zeza dhe sistemin e filtrimit të ujërave të zeza në Tiranë. Kemi pasur disa probleme me ish-administratën e Ministrisë së Transporteve, të cilat janë në rrugën e zgjidhjes, dhe për gjithë qytetarët e Tiranës lajmi i mirë është se projekti do të vazhdojë dhe investimi i nisur përgjatë rrugës së Kombinatit në njërën nga brigjet e Lanës, që mbulon ujërat e zeza për gjysmën e qytetit, do të përfundojë”.
Ndërkaq, gjatë vizitës në Japoni, Veliaj u takua edhe me Ministrin e Punëve të Jashtme, Taro Kono, ku bëri me dije se shumë shpejt pritet edhe heqja e vizave për qytetarët shqiptarë.
“Më në fund kemi një Ambasadë si në Shqipëri, ashtu edhe në Japoni, do të thotë se marrëdhëniet e vendeve janë në një nivel akoma më të lartë. Një nga kërkesat tona ka qenë edhe heqja e vizave për qytetarët shqiptarë, e cila po vlerësohet, sepse besoj se shkëmbimi mes njerëzve është po aq i rëndësishëm sa shkëmbimet e politikës, e shteteve, e burokracive apo edhe shkëmbimet ekonomike”.
Qeveria japoneze ka dhënë mbështetje për vendin tonë edhe në menaxhimit të emergjencave civile dhe transportin publik.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.