“Financimi i BB ka qenë efektiv” – Malpass: Ka ndihmuar dërgesën e 100 mln dozave të vaksinës së Covid-19

Banka Botërore theksoi në nisje të javës se financimi i organizatës ka ndihmuar në dërgesën e 100 milionë dozave të vaksinës së Covid-19 në botë dhe se do të arrijë 150 milionëshin deri në fund të Dhjetorit, nëse dozat mbërrijnë si ç’pritet.  Presidenti i Bankës Botërore, David Malpass, tha se organizata ka kontraktuar thuajse 300 milionë doza, me thuajse 7.5 miliardë dollarë në financim të operacioneve të vaksinës për 69 vende, që do angazhohen deri në fund të Dhjetorit.

Në një konferencë të Agjencisë së SHBA për Zhvillim Ndërkombëtar, Malpass theksoi nevojën që vendet e pasura të mbajnë premtimet bujare të dhurimit të dozave, si dhe prezantoi një databazë të re për të gjurmuar se cilat vende kanë nevojë për mbështetje financiare dhe operacionale. Marrëveshjet e këmbimit të dërgesave, si ajo e ndërmarrë së fundmi mes Bashkimit Afrikan, Shtetefve të Bashkuara dhe Moderna, kanë qenë pozitive në arritjen e nevojave afat-shkurtër.

“Gatishmëria dhe operimi janë kritike. Financimi është i mjaftueshëm dhe ne po punojmë me partnerë për të trajtuar krizën aktuale dhe të përgatitemi për të ardhmen”- tha Malpass, duke shtuar se të dhënat e avancuara dhe transparenca janë të rëndësishme për të siguruar që burimet shkojnë aty ku duhen më shumë.  Malpass tha se Gjurmuesi i Dorëzimit të Vaksinave i Bankës Botërore, do të ndihmojë në zgjidhjen e ngërçeve specifike të dërgesave.  Gjurmuesi është bazuar në një punë të përbashkët mes BB dhe OBSH, Unicef dhe GAVI.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.