Firmoset kontrata për ndërtimin e spitalit të ri në QSUT, investimi 14.4 mln euro
Një spital i ri 7 katësh i sëmundjeve të brendshme do të ndërtohet në Qendrën Spitalore Universitare Nënë Tereza në Tiranë, projekt i financuar nga kredia e Banka e Këshillit të Europës të përfituar nga Qeveria Shqiptare.
Kontrata për ndërtimin e spitalit të ri është firmosur nga Ministrja e Shëndetësisë Ogerta Manastirliu dhe Fabrizio Puccarelli, drejtor ekzekutiv i kompanisë INSO.
“Finalizuam një fazë shumë të rëndësishme të firmosjes së kontratës së dytë të projektit që modernizon Qendrën Spitalore Universitare Nënë Tereza, për ndërtimin e një spitali krejtësisht të ri të sëmundjeve të brendshme, një spital bashkëkohor që do të ofrojë një standard të ri shërbimi për qytetarët”, u shpreh Ministrja e Shëndetësisë dhe Mbrojtjes Sociale.
Spitali i ri, një investim prej 14.4 milion euro do të ndërtohet nga themelet brenda ambienteve të QSUT, ku do të përqendrohen të gjitha repartet e sëmundjeve të brendshme (të 6-katëshit aktual) duke filluar nga kardiologjia, hemodinamika, nefrologjia etj. si dhe do të bëjë bashkë shërbimin e mjekësisë interne, alergologjisë, të cilat së bashku me shërbimet ekzistuese do të kompletojnë profilin e një spitali të mirëfilltë të sëmundjeve interne.
Vendndodhja e spitalit të ri është pas spitalit ekzistues të ndërtuar në fazën e parë të master-planit të QSUT-së. Lidhja me të me ura në të gjitha nivelet, do të sjellë edhe integrimin e shërbimeve me njeri-tjetrin, duke bërë kështu të mundur centralizimin dhe optimizimin e shërbimeve, uljen e kostove dhe shfrytëzimin më të mirë të burimeve njerëzore. Ambienti lidhës ndërmjet dy spitaleve do të përdoret për pritjen e vizitorëve dhe pacientëve ambulator. Ky spital do të jetë me 7 kate, nga të cilët një nëntokë dhe me dritë natyrale në ambientet e brendshme.
Gjithashtu për një organizim dhe funksionim më të mirë të shërbimit të urgjencës, me ndërtimin e këtij spitali të ri, Shërbimi i Urgjencës do të transferohet në godinën e re me hyrje nga rruga e Dibrës, duke krijuar kështu lehtësi në lëvizjen e autoambulancave.
Ky projekt madhor parashikon gjithashtu edhe krijimin për herë të parë të një spitali ditor brenda kësaj strukture, me 60 shtretër, i cili do të reduktojë shfrytëzimin e shtretërve dhe do të ulë kostot për trajtimin e pacientëve që nuk kanë nevojë për hospitalizim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.