Fitimi i BMW bie me 78% Ndikojnë investimet në teknologji dhe akuzat ligjore

Fitimi i markës luksoze gjermane, BMW, ra me 78% në 589 milionë euro, pavarësisht rritjes së shitjeve të automjeteve.  Kjo erdhi ndërkohë që prodhuesi u përball me efektet e rritjes së investimeve dhe provigjoneve prej 1.4 miliardë euro.

Komisioni Europian vuri në dije prodhuesit gjerman të makinave muajin e kaluar se do përballen me gjoba të majme për teknologjinë e filtrimit të ndotjes. BMW ka mohuar pjesëmarrjen në këto aktivitete. Duke shtuar pesimizmin, kompania tha se pret që fitimi përpara taksave të jetë poshtë nivelit të vitit të kaluar.
BMW pret gjithashtu shitje të dobëta të makinave në gjysmën e parë 2019, ndërkohë që fabrikat janë ripajisur me mjete për të prodhuar modelet e reja seria 1 dhe 3. Shërbimet financiare kontribuan me 648 milionë euro, por kompania u përball me një humbje përpara taksave dhe interesave prej 310 milionë euro në njësinë e automjeteve.Aksionet e prodhuesit gjerman ranë me 1.6% në nisje të tregtisë europiane.

Investimet në teknologji të reja dhe rritja e kostove prej përputhjes me standardet e reja të ndotjes, kanë ndikuar gjithashtu të ardhurat.
BMW bëri të ditur se shpenzimet në fabrika dhe pajisje u rritën me 36% në 999 milionë euro gjatë tremujorit të parë, ndërkohë që kompania po përgatit fabrikat që të nxjerrin në treg serinë 3 dhe të ndërtojnë gjeneratën e ardhshme të makinave elektrike.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.