Fiton PD, Komisionet Parlamentare me prani fizike – Konferenca e Kryetarëve merr vendimin, Rushaj: në Kuvend u kthye ligjshmëria
Pas këmbënguljes së fortë të deputetëve të Partisë Demokratike, Kuvendi mori vendimin që mbledhjet e Komisioneve Parlamentare të zhvillohen fizikisht nëpër salla dhe jo online, siç qe vendosur fillimisht. Vendimi u mort ë hënën në Konferencën e kryetarëve, ku u përcaktua si kusht paraqitja e certifikatës së vaksinimit ose test PCR-je 48 orët e fundit.
Ndërkaq, me dakortesine e kryesisë se komisionit parlamentar mbledhjet mund te zhvillohen edhe ne distance nëpërmjet mjeteve te komunikimit elektronik, me terminal te pavarur deri ne përfundimin e gjendjes se epidemisë se shkaktuar nga COVID-19, duke lënë kështu të hapur mundësinë që ato gjithsesi të zhvillohen edhe online.
Vendimi i Konferencës së Kryetarëve është komentuar menjëherë nga Kreu i Grupit Parlamentar Demokrat, sipas të cilit, me këtë veprim, në Kuvend u kthye ligjshmëria. Alfred Rushaj tha për gazetarët se se u ra dakord që komisionet hetimore të kalojnë në seancën e datës 14 tetor për diskutim dhe miratim.
Pas këtij vendimi, mbledhjet e Komisioneve do mund të ndiqen fizikisht edhe nga mediat. Kamerat do të lejohen në sallë pesë minuta, ndërkohë që gazetarët do mund të ndjekin të gjitha mbledhjet.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.