Fleckenstein: Negociatat mund të çelen gjysmën e parë të vitit 2018. Vendimi mund të merret në Mars! Shqipëria të vazhdojë me reformat

Negociatat e Shqipërisë me BE mund të çelen gjysmën e parë të vitit të ardhshëm, pra vendimi mund të merret në muajin Mars dhe procedurat pritet të fillojnë zyrtarisht në muajin Qershor. Kështu është shprehur raporteri për Shqipërinë në Parlamentin Europian, Knut Fleckenstein, ku ndër të tjera shtoi se ky vendim mund të merret vetëm nëse Shqipëria vazhdon të punojë fort me reformat.

“Natyrisht nuk duhet të harrojmë se përgjegjësia për çeljen e negociatave është e Këshillit, jo e PE. Ju konfirmoj se ne në PE do të vazhdojmë të punojmë dhe të inkurajojmë aktoret, pra KE dhe Këshillin në mënyrë që negociatat të çelen gjysmën e parë të vitit që vjen, gjithmonë nëse Shqipëri vazhdon reformat. Vendimi mund të merret në Mars dhe pastaj çdo gjë të fillojë në Qershor. Shqipëria duhet të vazhdojë të punojë shumë në mënyrë që të çelen negociatat. Me çeljen e negociatave ne do te kemi mundësi të diskutojmë çështje të tjera deri në momentin që Shqipëria do të bëhet shtet anëtarë”, u shpreh Fleckenstein.

Gjithashtu raporteri i PE zbuloi edhe arsyen e vizitës së tij. “Kam ardhur në Shqipëri të shikoj si është situata sot pas zgjedhjeve të zhvilluara në qershor. Cilët janë prioritetet që ka jo vetëm qeveria, por edhe Kuvendi i Shqipërisë. Kam qenë i kënaqur nga kjo vizitë, ku kemi folur për procesin e Berlinit, si diçka shtesë jo si diçka që mund të zëvendësoje procesin e anëtarësimit”.

Raporteri i Shqipërinë në Parlamentin Europian foli edhe për takimet që ka zhvilluar, duke pohuar se pritet të takohet edhe me ministrat për të marrë mendimin e tyre siç e quajti ai, se çfarë rrugëtimi do të marrë Shqipëria.

“Jam takuar me Presidentin e Shqipërisë dhe me kryetarët e grupeve parlamentare në Kuvend. Do të takohem me ministra të qeverisë për të marrë informacion për rrugëtimin që do të marrë Shqipëria, si dhe do të diskutojmë për përqendrimin që duhet pasur në këto fusha, si në luftën kundër krimit të organizuar, korrupsionit dhe vazhdimit të reformës në drejtësi si një proces jo i lehtë”, shprehet raporteri i PE për Shqipërinë.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.