Fluks emigrantësh për festa – Hyjnë 109 598 shtetas në 48 orë, shtohen sportelet
Me ardhjen e festave të fundvitit, shtohet edhe fluksi i hyrjeve dhe daljeve në pikat doganore tokësore apo detare. Gjatë 48 orëve të fundit, sipas Departamentit për Kufirin dhe Migracionin, kanë hyrë 109 598 shtetas shqiptarë dhe të huaj, si dhe 26 892 mjete. Ndërsa kanë dalë 69 476 shtetas shqiptarë dhe të huaj, si dhe 18 965 mjete.
Gjithashtu, gjatë 48 orëve të fundit, kanë hyrë në vendin tonë edhe 11346 turistë të huaj nga vende të ndryshme, të organizuar në grupe dhe shoqata, me destinacione të ndryshme në vendin tonë. Po në kuadër të masave, Policia Kufitare ka shtuar prezencën policore edhe në patrullim në kufirin e jeshil dhe atë blu, me qëllim parandalimin, evidentimin dhe goditjen e çdo veprimtarie kriminale që mund të tentohet të kryhet nëpërmjet kufirit jeshil apo atij blu.
Ndërkohë, bëhet me dije se në të gjitha pikat e kalimit kufitar, porte dhe në aeroport janë shtuar sportelet në hyrje dhe në dalje, me qëllim, krijimin e lehtësirave ligjore, duke eliminuar radhët e gjata, si dhe për tu ofruar një shërbim cilësor dhe në kohë të gjithë shtetasëve shqiptarë e të huaj që qarkullojnë nëpërmjet këtyre pikave të kalimit kufitar.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.