Fluturimet komerciale u rritën me 23% në gusht – Nuk u aplikua asnjë masë kufizuese, Eurostat: Shqipëria, i vetmi vend me rritje
Shqipëria është i vetmi vend në Evropë që ka shënuar rritje të numrit të fluturimeve komerciale gjatë muajit gusht të këtij viti, në raport me të njëjtën periudhë të vitit të kaluar. Sipas të dhënave të Eurostat, fluturimet komerciale në vendin tonë gjatë gushtit u rritën me 23%, në raport me të njëjtin muaj të 2020-ës, ndërkohë që të gjithë vendet e tjerë të Europës, ndonëse kanë shënuar përmirësim, rezultojnë me rënie të fluturimeve, në raport me 2019-ën që nuk ishte një vit pandemik.
Sipas Eurostat, në gusht 2021, numri i fluturimeve komerciale në Bashkimin Evropian u rrit me 48% në krahasim me gushtin 2020, por këto shifra janë ende shumë nën nivelet e para-pandemisë. Më konkretisht, në raport me gushtin e vitit 2019, numri i fluturimeve komerciale është 31% më i ulët. Në terma absolutë, numri i fluturimeve komerciale ishte 479 000 në gusht 2021, krahasuar me 325 000 në gusht 2020 dhe 696 000 në gusht 2019. Për të parandaluar përhapjen e pandemisë COVID-19, vendet në mbarë botën kanë marrë një sërë masash kufizuese që nga fillimi i vitit 2020. Për shkak të këtyre kufizimeve, industria e transportit ajror pësoi një goditje.
Gjatë muajit gusht, Shqipëria nuk aplikoi asnjë masë kufizuese për hyrjet e shtetasve të huaj në vendin tonë. Kjo, ndryshe nga shumë shtete të tjerë, të cilët kërkonin paraqitjen e certifikatës së vaksinimit, dokumentin që vërtetonte se personi kaluar infeksionin apo testin PCR negativ. Këto masa kufizuese në vendin tonë nisën të aplikohen në vendin tonë në datën 6 shtator.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.