FMN kërkon rregulla të njëjta “loje”-Rekomandimi për qeverinë: Bizneset të trajtohen të gjitha njësoj!
Në raportin e publikuar menjëherë pas përfundimit të misionit të dytë të monitorimit, pas programit, Fondi Monetar Ndërkombëtar jep edhe 6 këshilla për qeverinë shqiptare.
Të 6-ta këto rekomandime, i referohen disiplinës fiskale, duke qenë se fondi është pikërisht rojtar i saj, pra i financave të shëndosha dhe i aftësisë së shëndoshë të një vendi për të shlyer detyrimet që ka.
Pika e parë, së cilës i referohet FMN në formë rekomandimi ndaj qeverisë shqiptare është ajo që thotë se, institucioni nxit qeverinë shqiptare që të shfrytëzojë momentin e favorshëm ekonomik duke zgjeruar bazën e taksave.
Në kuadër të kësaj, FMN kërkon edhe një korrigjim, pra anulim të disa ndryshimeve fiskale të aprovuara me paketën fiskale të këtij viti. Duke qenë se Shqipëria s`mund t`ia lejojë vetes që të shkurtojë shpenzimet, duke pasur parasysh hendekun mjaft të madh që ka në infrastrukturë me vendet e tjera, duhet që të rrisë medoemos të ardhurat. Dhe këtë mund ta bëjë vetëm duke rritur taksat, zgjeruar bazën e tyre, dhe sidomos përmirësuar mbledhjen e të ardhurave.
“Rekomandojmë fuqizimin e sistemit tatimor nëpërmjet anulimit të masave që e fragmentojnë dhe dobësojnë bazën tatimore dhe nëpërmjet nivelimit të fushës së lojës për bizneset”, shkruan FMN në deklaratën pas përfundimit të misionit. Nivelimi i fushës së lojës për bizneset është një koncept që përkthehet në rregulla të barabarta loje.
Pra, FMN, rekomandon qeverinë shqiptare që të anulojë lehtësitë fiskale të miratuara pak muaj më parë si dhe t`i trajtojë njësoj sipërmarrjet, jo të vendosë sisteme të ndryshme taksimi për to, duke krijuar për rrjedhojë edhe konkurrencë të pandershme.
Pak kohë më parë, FMN shkruante se, ndryshimet e fundit fiskale, sidomos në drejtim të TVSH, e kanë vështirësuar tejmase sistemin tatimor, duke krijuar shtigje të reja për të shmangur pagesën e taksave.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.