FMN këshilla Eurozonës, Lagarde: Krijoni një fond për ditë të vështira, vazhdoni me reformat
Tashmë që Eurozona ka rikonfirmuar vullnetin për të vazhduar me reformimin, edhe Chrtistine Lagarde i është rikthyer këshillave. Kreu i Fondit Monetar Ndërkombëtar ka propozuar kështu krijimin e një fondi për ditë të vështira.
Gjatë fjalimit të saj në Berlin, Christine Lagarde vuri theksin edhe te periudha mjaft e mire që po kalon ekonomia globale. Por, nga ana tjetër, ka forca të tjera që kërcënojnë.
“Mendoni për rritjen e populizmit dhe thirrjet dritë-shkurtra për politika proteksioniste”, shtoi ai, duke thumbuar kështu presidentin amerikan, Donald Trump.
Sa i përket Eurozonës, Lagarde i këshilloi vendeve anëtarë që të zhvillojnë një treg të modernizuar të përbashkët të kapitalit, një union të përmirësuar bankar si dhe të lëvizin drejt integrimit më të madh fiskal, duke filluar që me ndërtimin e një institucioni qendror fiskal.
Diçka e tillë, do të siguronte investitorët, nënvizoi ajo. Sa i përket fondit për ditë të vështira, ajo propozoi që të funksionojë me kontribute nga secili vend anëtar, paratë e të cilët do të shpërndahen në kohë të vështira sipas nevojës së gjithësecilit, praktikisht si një arkë kursimi.
Por nga ana tjetër, tërheqja e parave do të kushtëzohej me respektimin e rregullave të përbashkët fiskalë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.