FMN optimiste për botën, Lagarde: Për herë të parë në 6 vite, ekonomia në vrull
“Rimëkëmbja ekonomike globale po fiton vrull, por nga ana tjetër, ky vrull mund të ndalet nga vala e proteksionizmin që po kërcënon tregtinë globale”, deklaroi kryetarja e Fondit Monetar Ndërkombëtar, Christine Lagarde. Deklaratat e saj vijnë vetëm një javë përpara takimit periodik të pranverës me Bankës Botërore në Washington.
Pavarësisht se, Lagarde në asnjë moment nuk i është referuar Donald Trump, fjalët e saj nuk lënë shumë vend për hamendësime. Gjithsesi, për te parën herë ndër vite, Lagarde deklaroi se, ekonomia globale është duke hyre në një cikël pozitiv.
“Lajmi i mirë është se, pas 6 vitesh një rritje ekonomike zhgënjyese, ekonomia globale po fiton vrull ndërkohë që rimëkëmbja ciklike premton më shumë vende pune, të ardhura më të larta dhe një perspektivë më të ndritur për të ardhmen”, shtoi Lagarde.
Sipas saj, perspektiva është më e mirë për ekonomitë e zhvilluara, ku dominon manifaktura, ndërkohë që as vendet në zhvillim nuk mbeten prapa. Këto të fundit do të kontribuojnë më shumë se tre të katërtat në rritjen ekonomike globale gjatë këtij viti.
Pasiguritë politike, proteksionizmi në tregtinë globale si dhe kushtet më të shtrënguara financiare janë rreziqet kryesore për ekonominë globale sipas saj.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.