FMN paralajmëron për tregtinë – Tarifat tregtare po ngadalësojnë ekonominë botërore
Fondi Monetar Ndërkombëtar paralajmëroi se ekonomia botërore përballet me rreziqe dhe vende të caktuara nuk duhet të bëjnë gabime të shtrenjta politike, ndërkohë që duhet arritur një zgjidhje në luftën tregtare nëpërmjet dialogut.
FMN uli projeksionet për rritjen ekonomike botërore në 3.2% në vitin 2019 dhe 3.5% në 2020-ën, në raportin “Perspektiva Ekonomike Botërore” të publikuar në Korrik.
Gita Gopinath, shefja e ekonomistëve të FMN, theksoi se ulja e projeksioneve ka ardhur pasi ekonomia botërore ndodhet në një fazë të vështirë.
Një nga rreziqet më të mëdha është ajo që po ndodh me tregtinë. Ka pasiguri të mëdha në atë që po ndodh mes Kinës dhe Shteteve të Bashkuara.
Sipas vlerësimeve tona, tarifat që janë vendosur deri më tani pritet të ulin PBB botëror me 0.8% në vitin 2020.
Ekonomistja paralajmëroi gjithashtu se disa vende të caktuara duhet të shmangin vendimet e shpejta dhe irracionale, si dalja e Britanisë nga Bashkimi Europian pa një marrëveshje tregtare dhe politikat tarifore të Shteteve të Bashkuara.
Sipas saj, këto jo vetëm që do ndikojnë te stabiliteti i tregjeve të kapitalit, por do të pengojnë dhe rritjen ekonomike botërore.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.