FMN për Azinë – Politikat fiskale në SHBA dhe rritja e kreditit në Kinë kërcënojnë rajonin
Fondi Monetar Ndërkombëtar deklaron se paqartësia mbi përmasën e stimujve fiskal në SHBA dhe rritja e shpejtë e kreditit në Kinë, përbëjnë rreziqe për perspektivën ekonomike të Azisë. Zyrtarët e Fondit me seli në Uashington theksuan se rritja e normës së interesit nga Rezerva Federale mund të sjellë një fuqizim të dollarit, gjë që do të rëndojë barrën e borxhit për ekonomitë aziatike me huamarrje të denominuar në dollarë.
“Vendet aziatike vazhdojnë të kryesojnë në rritjen ekonomike të nxitur nga kërkesa e fortë dhe politikat lehtësuese. Perspektiva afat-shkurtër përmban rreziqe dhe pasiguri, si mungesa e detajeve mbi politikat ekonomike në SHBA dhe mbi përbërjen dhe përmasën e stimujve fiskalë të propozuar nga Donald Trump”, nënvizon Fondi.
Zyrtarët bënë thirrje për politikëbërësit në rajon që të adaptojnë politikat e tyre fiskale në mënyrë që t’i bëjnë ballë edhe plakjes dhe rritjes së ngadaltë të popullsisë. Politikëbërësit duhet të trajtojnë sfidat demografike nëpërmjet reformave për të reduktuar kostot në sistemin e pensioneve dhe kujdesin shëndetësor, duke ofruar incentiva tatimore për të rritur pjesëmarrjen e fuqisë punëtore dhe duke formuar plane afat-mesëm fiskalë që sigurojnë qëndrueshmërinë e borxhit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.