FMN për informalitetin në Shqipëri – Në 32.7% të PBB gjatë tranzicionit, minimumi u prek në 2011
Një studim mjaft interesant, i sapo publikuar nga Fondi Monetar Ndërkombëtar, me titull; “ekonomia informale nëpër botë; çfarë mësuam në këto 20 vitet e fundit?” tregon se, ekonomia informale, apo ekonomia hije siç njihet ndryshe, në Shqipëri ka qenë mesatarisht 32.7% e Prodhimit të Brendshëm Bruto gjatë periudhës së tranzicionit, pra në vitet 1991-2015.
Kjo normë bën që, Shqipëria të renditet në vendin e 54-ta në botë, ndër 158 shtete të ndryshme të globit të marra në analizë nga Fondi Monetar Ndërkombëtar. Kjo renditje ndërkohë bëhet mbi bazën e një tjetër metodologjie te matjes së ekonomisë informale, dhe që Shqipërisë i jep një normë në 28.5%.
Analiza e institucionit me bazë në Washington fokusohet edhe në secilin prej viteve, që nga 1991. Studimi arrin në përfundimin se, viti më problematik për Shqipërinë ka qënë pikërisht viti 1991, me një normë në mbi 43%.
Viti më i mirë rezulton ai 2011, me një normë në 25.41%. Periudha e studimit është deri në vitin 2015, pra nuk merr parasysh periudhën kur është intensifikuar aksioni anti-informalitet.
Në 2015, thotë FMN, norma e ekonomisë informale në raport me prodhimin e brendshëm bruto fiksohej në 26.21% të PBB. Me përjashtime mjaft të vogla, gjatë këtyre 25 viteve të marra në analizë, ecuria ka qenë thuajse konstante, me informalitetin në trend rënës nga viti në vit.
Në linja të përgjithshme, studimi i FMN, që flet për një normë ekonomi informale në një të tretën e asaj të përgjithshme, tregon se sa ka humbur në të vërtetë ekonomia nga ky informalitet, jo vetëm në formë evazioni, pra taksash të humbura, por edhe në drejtim të konkurrencës së pandershme, që jo vetëm dëmton biznesin e ndershëm, por edhe largon investitorët potencialë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.