FMN për Kosovën: Administratë më e vogël dhe me paga më të ulëta. Rritja e pagës minimale, e pamundur
Fondi Monetar Ndërkombëtar ka përmbyllur misionin dyjavor në Prishtinë ku zhvilloi bisedimet për konsultimin e Artikullit IV. Pas takimeve me autoritetet në Kosovë, FMN ka publikuar edhe një deklaratë ku shpjegon situatën aktuale dhe reformat që duhen ndërmarrë.
Për vitin 2017 rritja ekonomike pritet në 4.1% dhe këndvështrimi afatmesëm mbetet i favorshëm, megjithëse me disa rreziqe. Që rritja të tejkalojë 4 përqindëshin edhe në vijim duhet të ecin përpara projektet si centrali i ri i prodhimit të energjisë, si edhe reformat në sektorë të ndryshëm.
Pikë së pari Kosova duhet të përmirësojë klimën e biznesit, duke bërë ndryshime legjislative dhe rregullatore, të cilat do të reduktojnë kostot e të bërit biznes, si edhe do të barazojë në fushën e lojës debitorët dhe kreditorët. Një shtysë për investime të huaja do të vinte edhe nëse do të përdorej një platformë prokurimi elektronike dhe nëse do të kryheshin auditime shtesë për projektet e investimeve të mëdha publike.
FMN ka kritika edhe për qeverinë dhe administratën publike, të cilat kanë një nevojë urgjente për të reduktuar mungesën e eficencës.
“Reformat prioritare përfshijnë përmirësimin e qeverisjes duke forcuar pavarësinë e bordeve mbikëqyrëse, publikimin në kohë të pasqyrave financiare, auditeve të jashtme dhe duke reduktuar ndjeshëm kostot operative duke shkurtuar punësimin dhe duke reduktuar faturat e pagave të larta. Kjo do t’i hapte rrugë edhe përfshirjes së sektorit privat në planin afatmesëm, së bashku me privatizimet”, rekomandon FMN.
Sa i takon problemit të papunësisë, qeveria duhet të implementojë sa më parë politikat për trajnime, sidomos tek të rinjtë dhe tek femrat.
Ndërsa rritjen e pagës minimale, fondi e konsideron të pamundur, pasi do të shkaktonte më tepër probleme dhe disavantazhe për punonjësit e paspecializuar dhe të rinjtë, duke ndikuar gjithashtu në gjenerimin e trysnisë për benefitet e larta sociale.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.