FMN rishikon Shqipërinë – Rritja e njëjtë, përmirësohen indikatorët e kërkesës, çmimeve dhe punës
Fondi Monetar Ndërkombëtar nuk ka ndryshuar mendim për ecurinë e ekonomisë shqiptare në linja të përgjithshme. Projeksionet më të fundit të institucionit flasin për një rritje ekonomike të Shqipërisë pranë 3.7% këtë vit dhe 3.8% vitin e ardhshëm, po aq sa vlerësohej në projeksionet e kaluara, ato të muajit Tetor.
Por ndërkohë, FMN ka vlerësuar në rritje performncën e ekonomisë sonë gjatë vitit të kaluar, nga 3.7% rritje, në 3.9% rritje.
Projeksionet për Kosovën, Maqedoninë dhe Bosnje Hercegovinën gjatë këtij viti dhe atij të ardhshëm janë rishikuar në rritje të ndjeshme, çka ka gjeneruar edhe zbritjen e Shqipërisë në vend të dytë në rajon për nga norma e rritjes ekonomike.
Lajmi i mirë është se në vend të parë është vendosur Kosova, me një rritje pranë 4% për të dyja vitet. Sa i përket prodhimit të brendshëm bruto për frymë, projeksionet e reja në horizontin afat-mesëm, tregojnë se, deri në vitin 2022, rritja do të ngjitet në 4.1%.
Por, ndërkohë që për ekonominë tonë, projeksionet e rritjes nuk kanë pësuar ndryshim, të tjera projeksione kanë pësuar luhatje. Një ndër to është ai i rritjes së kërkesës së brendshme, me më shumë se 1 pikë përqindje rishikim. Edhe projeksionet për ecurinë e tregut të punës janë rishikuar lehtë në territor pozitiv.
Sa i përket inflacionit ndërkohë, çmimet pritet të mos rriten me hap aq të shpejtë sa mendohej më parë. Një ndër indikatorët që është rishikuar negativisht ndërkohë është ai i borxhit publik, ku optimizmi është venitur tërësisht.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.