FMN ul projeksionet për Kinën – Ekonomia do të rritet me 6.2% këtë vit, nga 6,3% prej luftës tregtare
Fondi Monetar Ndërkombëtar uli projeksionet për rritjen ekonomike kineze në vitin 2019 në 6.2%, prej pasigurisë mbi konfliktet tregtare. Fondi theksoi se do të duhen më shumë stimuj monetarë nëse lufta tregtare merr vrull.
Reduktimi i projeksioneve vjen 2 muaj pasi Fondi rriti parashikimin për ekonominë kineze në 6.3%, ndërkohë që negociatat tregtare me SHBA po shkonin mirë. Përkeqësimi i konfliktit tregtar muajin e kaluar shfaqi rreziqet për ekonominë e dytë më të madhe në botë nga rritja e tarifave amerikane.
Washingtoni ka rritur tarifat ndaj 250 miliardë dollarë mallrave kinezë, duke akuzuar vendin se detyron transferimin e teknologjisë dhe vjedh pronën intelektuale. Kina, që i ka mohuar këto akuza, është kundërpërgjigjur me tarifa ndaj 110 miliardë dollarë mallrave amerikanë.
“Ekonomia pritet të ngadalësohet në 6.2% këtë vit dhe 6% në 2020-ën”, deklaroi Fondi Monetar Ndërkombëtar. Presidenti i Shteteve të Bashkuara ka kërcënuar tarifa prej 25% ndaj të gjithë importeve kineze. Lufta tregtare ka penguar deri më tani zinxhirin botëror të ofertës dhe rritjen ekonomike.
Analistët thonë se tarifat do të godasin edhe Shtetet e Bashkuara dhe shqetësimi i investitorëve mund të çojë ekonominë botërore në recession. Banka Qendrore e Kinës ka ulur normën e rezervave të detyrueshme 6 herë që prej fillimit të 2018-ës, për të nxitur huadhënien dhe mbështetur ekonominë. Fondi bëri të ditur se stimujt e lajmëruar deri më tani janë të mjaftueshëm për të stabilizuar ekonominë këtë vit edhe tjetrin, nëse tarifat nuk vazhdojnë të rriten.
Klevis Llaha /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.