Fond për dëmtimet DS4 dhe DS5. Qeveria jep 3.3 mln USD për rindërtimin, 800 mijë për projektet në Tiranë

Afërsisht 3.3 milionë dollarë është fondi që Këshilli i Ministrave ka vënë në dispozicion të tre bashkive për rindërtimin e banesave të ndërtuara nga tërmeti i 26 nëntorit. Një pjesë e tij është llogaritur për mbulimin e kostove të punimeve për banesat e dëmtuara relativisht lehtë. Ndërkohë që pjesa tjetër do të shkojë për hartimin e projekteve të rindërtimit për godinat e dëmtuara rëndë në Tiranë e Kurbin.

Më datë 13 gusht, Këshilli i Ministrave ka vendosur përdorimin e fondit të rindërtimit, miratuar në buxhetin e vitit 2020, në masën 186.7 milionë lekë, për financimin e rikonstruksionit ose të riparimit të banesave individuale dhe të njësive të banimit në ndërtesa (pallat) për ata individë, të cilët përfitojnë nga grantet e rikonstruksionit, banesat e të cilëve janë klasifikuar si objekte të dëmtuara rëndë apo të dëmtuara lehtë, si pasojë e fatkeqësisë natyrore, dhe që nuk duhen rindërtuar nga e para, në bashkitë Shijak dhe Kurbin.

Po më 13 gusht, Këshilli i Ministrave ka vendosur përdorimin e fondit të rindërtimit, miratuar në buxhetin e vitit 2020, në masën 144.2 milionë lekë pa TVSH, për financimin e hartimit të projektit të ndërhyrjeve rehabilituese/përshtatëse, të nevojshme për kthimin e strukturës së objekteve që janë klasifikuar si objekte me dëmtime të mëdha strukturore ose dëmtime shumë të rënda jo-strukturore (me shkallë dëmtueshmërie DS4 dhe DS5), në bashkitë Tiranë dhe Kurbin

Bashkisë Tiranë i transferohet fondi prej 87.3 milionë lekë për hartimin e projekteve rehabilituese, ndërsa Bashkia Kurbin do të marrë fondin prej 56.9 milionë lekësh.

Lorenc Rabeta / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.