Fonde të reja për “Start-Up” dhe “Inovacionin” – Mbështetje deri në 500 mijë lekë. Ja cilat biznese mund të përfitojnë
Bizneset shqiptare do të mund të përfitojë nga dy fonde për mbështetjen e “start-up”-eve dhe inovacionit, të cilët janë rikthyer si opsion për sipërmarrësit edhe pas vitit të kaluar. Këshilli i Ministrave vendosi në mbledhjen e ditës së premte të miratojë krijimin e tyre për një kohëzgjatje prej 3 vjetësh.
Fondi në Mbështetje të Sipërmarrjeve të Reja “Start-up”
Ky fond, i cili do të menaxhohet nga Agjencia Shqiptare e Zhvillimit të Investimeve (AIDA), do të ketë një vlerë të përgjithshme prej 30 milionë lekësh, të ndarë në 10 milionë lekë në vit dhe ka në fokus ndërmarrjet e sapokrijuara mikro dhe të vogla në kërkim të tregjeve.
Kushti për të përfituar është që sipërmarrjet të zhvillojnë veprimtarinë në një nga sektorët e mëposhtëm:
- a) sektorët prodhues e të shërbimit;
- b) sektorin e industrisë së lehtë;
- c) sektorin e turizmit;
ç) fushën e kërkimit dhe të zhvillimit;
- d) procesin e agropërpunimit;
- dh) fushën e disenjimit, të modelimit dhe artizanatit.
Ky fond do të mbulojë deri në 70% të kostove të miratuara nga komisioni vlerësues, në një vlerë maksimale prej 500 mijë lekë, vlerë e cila ndahet 50% në fillim të projektit dhe 50% në përfundim të tij. Kjo do të thotë se nga ky fond mund të përfitojnë së paku 20 sipërmarrje të reja në vit.
Kostot e pranueshme përfshijnë makineritë, marketingun, trajnimin e stafit, krijimin e një faqeje në internet apo pjesëmarrjen në ekspozita e panaire. Sipërmarrja fituese duhet të ketë selinë brenda territorit të vendit dhe duhet të krijojë minimalisht 1 vend të ri pune brenda një viti nga përfitimi i fondit.
Fondi i Inovacionit
Ky fond do të ketë një vlerë edhe më të madhe se i pari, prej 45 milionë lekësh, ku do të jenë të disponueshme 15 milionë lekë çdo vit.
Financimi për mbulim kostosh do të jetë deri në 50%, për një vlerë maksimale prej 400 mijë lekësh. Ndërsa për ndërmarrjet që do të aplikojnë për blerje pajisjesh teknologjike, financimi maksimal është 600 mijë lekë.
Krahas bizneseve mikro dhe të vogla, nga ky fond mund të përfitojnë edhe bizneset e klasifikuara si të mesme, me kushtin që të kenë selinë brenda territorit të vendit dhe të prodhojnë në Shqipëri produkte dhe/apo ofrojnë shërbime inovative, të cilat tregtohen brenda dhe/apo jashtë vendit.
Ndër kostot që do të pranohen për t’u bashkëfinancuar përfshihen kostot për auditim të kapacitetit inovativ dhe teknologjik, ndërkombëtarizimin e teknologjisë, pjesëmarrjen në panaire inovacioni, blerje pajisjesh teknologjike, licenca dhe patenta për software dhe hardware.
Ashtu si në fondin e sipërmarrjeve start-up, pagesa e fondit do të kryhet 50% në fillim të projektit dhe 50% në përfundim të tij, kundrejt faturës së shpenzimeve të kryera.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.