Fondet e investimit-Tregu në rënie, por Credins Premium rritet

Tregu i fondeve të investimit e mbylli në rënie vitin e kaluar. Sipas të dhënave nga Autoriteti i Mbikëqyrjes Financiare, vlera e aseteve neto në fund të vitit 2018 ishte 66 miliardë lekë, në rënie me 9% që nga fillimi i vitit. Tregu po pëson rënie jo vetëm në volume, por edhe në numër anëtarësh. Në fund të dhjetorit, numri i anëtarëve ra në rreth 29 mijë, nga 31 mijë që ishte në fund të vitit 2017.

Rënia e tregut i detyrohet sidomos zvogëlimit të përmasave të dy fondeve më të mëdha, që menaxhohen nga Raiffeisen Invest. Fondi në lekë, Raiffeisen Prestigj pësoi rënie të aseteve neto me 16%, ndërsa fondi në euro Raiffeisen Invest ra akoma më shumë me 30%. Fondi më i ri Raiffeisen Vizion, ka arritur rreth gjashtë miliardë lekë aktive, por kjo nuk kompenspon rënien me afro 14 miliardë lekë të aseteve të fondeve më të hershëm të themeluara nga banka Raiffeisen.

Nga ana tjetër, në rritje është fondi i investimeve Credins Premium, që i ka zgjeruar asetet me 113% gjatë vitit të kaluar. Megjithëse pjesa e tregut të Credins Premium ngelet ende modeste, me rreth 3%, në vitet e para të aktivitetit ai po regjistron një rritje të shpejtë.

Vitin e kaluar nisi aktivitetin edhe fondi i investimeve Top Invest, por pjesa e tregut në fund të vitit të parë ishte mjaft e ulët, me rreth 0.1% të aseteve neto.

Struktura e investimeve të këtyre fondeve gjatë vitit 2018 nuk ka ndryshuar shumë krahasuar me një vit më parë. Investimet në lekë dominohen nga obligacionet dhe bonot e thesarit, që zënë pothuajse 90% të vlerës totale të aseteve. Kjo është e kuptueshme, po të kemi parasysh se deri tani tregu i brendshëm nuk ofron alternativa të tjera.

Frenimi i rritjes së fondeve të investimit mund të shpjegohet edhe me këtë faktor. Megjithatë, këtë vit gjendja mund të ndryshojë me nisjen e tregtimit të titujve private në Bursën ALSE. Kjo do t’iu japë investitorëve institucionalë dhe individualë mundësi të reja, në formën e obligacioneve ose aksioneve të kompanive private.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.