Fondi i Kompensimit – 6.7 milionë euro dëme deri në fund të vitit 2019
Dëmet nga mjetet e pasiguruara në Shqipëri vazhdojnë të kenë përmasa të konsiderueshme. Mbështetur në të dhënat e Autoritetit të Mbikëqyrjes Financiare, deri në fund të vitit të kaluar detyrimet e Fondit të Kompensimit të Byrosë Shqiptare të Sigurimeve kishin vlerën e 829 milionë lekëve ose rreth 6.7 milionë eurove. Kjo shumë përfshin dëmet e miratuara, ato që janë në fazë ekzekutimi pas vendimit të gjykatave, si edhe dëmet që janë ende objekt i çështjeve gjyqësore në shkallë të ndryshme.
Fondi i Kompensimit është i ngarkuar me ligj të paguajë dëmet e shkaktuara nga mjetet e pasiguruara ose ato të paidentifikuara. Vetëm në vitet e fundit, me insistimin e Komisionit Kuvendor të Ekonomisë dhe AMF-së, është arritur shlyerja e detyrimeve që kishin arritur përmasat e dhjetëra milionë eurove. Disa prej dëmeve të papaguara datonin që në fillimin e viteve 2000. Gjatë tre viteve të fundit, Fondi i Kompensimit ka shlyer dëme në vlerën e 2.3 miliardë lekëve ose rreth 18.7 milionë eurove.
Megjithatë, pagesa e dëmeve nga Fondi i Kompensimit ngelet një proces problematik, që kërkon inspektime dhe ndërhyrje të shpeshta nga autoriteti mbikëqyrës i tregut të sigurimeve. Për shkak të zvarritjeve në proces, vitin e kaluar AMF-ja ka ndërmarrë masa ndëshkuese ndaj drejtuesve të Byrosë dhe kompanive të sigurimit.
Me ligjin e ri për sigurimin e detyrueshëm, Fondi i Kompensimit pritet të ndahet nga Byroja Shqiptare e Sigurimeve dhe të jetë një ent i veçantë.
Gjithashtu, pritet që drejtori i Fondit të emërohet nga Autoriteti i Mbikëqyrjes Financiare, me qëllim garantimin e një kontrolli më të fortë. Megjithatë, kompanitë e sigurimeve e kanë kundërshtuar një dispozitë të tillë dhe arbitër pritet të jetë Ministria e Financave, që prej pothuajse dy vitesh nuk po e propozon për miratim projektligjin.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.