Forcohet kontrolli mbi tenderët publikë – Kush tërhiqet nga gara, paguan penalitet 2% të vlerës
Procedurat për dhënien e tenderave publike do të kenë një kontroll më rigoroz, me qëllim rritjen e transparencës dhe shmangien e abuzimeve me fondet shtetërore. Komisioni i Ekonomisë ka diskutuar ndryshimet në ligjin e “Prokurimit publik”, të cilat sjellin një sërë risish dhe adresojnë shqetësimet e ngritura vazhdimisht për procedura korruptive nga institucionet publike. Drafti parashikon penalitete për operatorët ekonomikë që futen fiktivisht në garë.
“Per herë te pare parashikohet një formular i vetëm vetedeklarimi, lehtësim pjesëmarrjes se operatoreve ekonomik. Operatori vetëm do vetedeklaroje qe plotëson kushtet. Vetëm me vetëdeklarim gjatë procesit të ofertimit. Sigurimi i ofertave, nëse tërhiqen nga gara u mbahen një penalitet në 2 për qind të fondit limit të ofertës”, u shpreh Reida Kashta, Drejtore e Agjencisë së Prokurimit Publik.
Po ashtu, një risi tjetër është ndjekja e zbatimit të kontratave pas nënshkrimit të tyre. “Do ndiqet kontrata dhe pas nënshkrimit dhe nëse gjenden pa rregullsi do te prishet”.
Ndryshimet në ligj parashikojnë gjithashtu njoftimet paraprake që operatorët të kenë më shumë informacion për të qenë më të përgatitur në ofertim, duke synuar rritje te transparencës dhe më shumë pjesëmarrës në tendera. Ndërsa ndryshon dhe mënyra e ankimimit, për ti bërë ato më efektive.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.