Forumi Botëror i Urbanistikës përzgjedh Tiranën si një nga 3 qytetet që ka pësuar më shumë ndryshime
Tirana është përzgjedhur nga Forumi Botëror i Urbanistikës si një nga tre qytetet që ka pësuar më shumë ndryshime vitin e fundit, së bashku me Neëscastle-in e Australisë dhe Panama City-n e Panamasë.
Kryebashkiaku i Tiranës, Erion Veliaj i cili ishte i ftuar në këtë forum që u zhvillua në Kuala Lumpur të Malajzisë pjesë e të cilit ishin drejtues vendorë, investitorë, organizata qeveritare dhe ekspertë në fushën e zhvillimit të qëndrueshëm urban prezantoi edhe projektet transformuese të kryeqytetit.
“Gjithashtu, jam i ndërgjegjshëm se kemi ende shumë punë për të bërë, por sot ishte një mundësi për të treguar se me pak vullnet, me dëshirë dhe me një bashkëpunim nga i gjithë komuniteti, duke filluar nga fëmijët deri te pensionistët, mund të kemi qytetin e ëndrrave tona”, tha Veliaj.
Ndërkohë, ai shtoi më tej se këto ndryshime të realizuara në një kohë shumë të shkurtër kanë ardhur edhe falë bashkëpunimit mes qeverisë qendrore dhe asaj lokale, si dhe nga përfshirja e biznesit.
“Ishte një mënyrë për të folur për mënyrën se si në një kohë të shkurtër kemi realizuar projekte të mëdha si sheshi “Skënderbej”, projekti i Pazarit të Ri, Bulevardi i Ri, dhe shumë vepra të infrastrukturës, për mënyrën se si është përfshirë edhe biznesi, se si shumë kompani adoptuan një kopshët a çerdhe, për mënyrën se si fëmijët kanë pasur një rol fantastik avokatie për ditët pa makina, e që më vonë u përkthye në më shumë hapësira pedonale apo gjithë betejat për kënde lodrash që sot janë kthyer në një akupunkturë për qytetin. Të gjitha këto na bëjnë të ndihemi krenarë, sepse sot kemi një qytet më të jetueshëm.”
Gjatë muajit mars në Tiranë do të vijë edhe një flotë me 4 mijë biçikleta, ndërkohë që pritet që gjatë këtij viti të zgjidhet përfundimisht edhe problemi i mësimit me dy turne në shkolla.
“Me shkollat e reja që mbarojmë këtë vit, si “Servete Maçi” dhe “Kosova”, por edhe me paketën tonë të shkollave të reja, do të kemi zgjidhur përpara zgjedhjeve të vitit 2019 çështjen e arsimit me dy turne në Tiranë”, tha Veliaj.
Veliaj u ndal po ashtu edhe te përmirësimi i sektorit të infrastrukturës, ku sipas tij gjatë vitit 2019 janë parashikuar të bëhen ndërhyrje edhe në 50 blloqe të tjera.
Kryetema e Forumit Botëror të Urbanistikës ishte Axhenda e Re Urbane, e cila u miratua në Konferencën e OKB-së mbi Zhvillimin Urban të Qëndrueshëm në Tetor të vitit 2016 që ka për qëllim krijimin e qyteteve që shërbejnë si qendra të mirëqenies sociale ku njëkohësisht në fokus kanë edhe mbrojtjen e mjedisit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.