[FOTO] Amfiteatri i Tiranës gati për ceremoninë e inaugurimit – Ja transformimi

Amfiteatri në Parkun e Madh të Liqenit Artificial është gati për ceremoninë e përurimit më 30 Maj, pas rehabilitimit tërësor të nisur vjeshtën e kaluar. Agjencia e Parqeve dhe Rekreacionit po kryhen sistemimet e fundit, ndërsa ka zbuluar edhe disa foto të arenës së transformuar.

Punimet e kryera kanë prekur ndenjëset e teatrit në natyrë, gjelbërimin përreth, shtrimin me pllaka prej guri, si dhe ngritjen e një strukture prej hekuri mbi skenë për vendosjen e dritave, ndër të tjera.

Amfiteatri do të shërbejë jo vetëm si një atraksion, por do të jetë edhe i hapur për çdo artist që kërkon të performojë në skenën e tij. Për këtë qëllim, Agjencia e Parqeve dhe Rekreacionit ofron në faqen e saj mundësinë e rezervimit të amfiteatrit për eventet e propozuara nga artistë apo publiku.

Skena e hapur do të ketë një kapacitet prej 1522 vendesh dhe është e përshtatshme për festivale, koncerte, teatër, konferenca, shfaqje cirku dhe kinema verore.

Amfiteatri i Tiranës u projektua si ide në vitin 1960 nga arkitekti bullgar Zheko Zhikov, por nisi ndërtimin vetëm 13 vite më pas duke iu besuar inxhinierit Temo Vito, për t’u inauguruar në pranverën e vitit 1974.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.