[FOTO] Ja si do të jenë shkollat e reja në Tiranë – Boeri, arkitekti i shkollës në Don Bosko, Kodër-Kamëz dhe Sheshin Shqiponja
Tre nga shkollat e reja që do të ndërtohen në Tiranë vitet e ardhshme përmes partneritetit publik-privat janë dizajnuar nga studioja e arkitektit Stefano Boeri. Arkitekti italian, i cili ka hartuar edhe planin e zhvillimit të kryeqytetit, do të ndërtojë tre struktura ku do të vendosen pesë shkolla 9-vjeçare dhe të mesme.
Shkollat moderne do të ngrihen në zonat e Don Boskos, Kodër-Kamëz dhe Sheshit Shqiponja.
Kompania “AGI KONS” që u shpall fituese e tenderit me vlerë 1.6 miliard lekë për ndërtimin e shkollave në Zonën Tirana 1, ka kontraktuar Boerin, i cili ka ardhur me konceptin e “Shkollave të Hapura për Tiranën”.
Shkollat do të qëndrojnë të hapura 24 orë në ditë dhe do të mirëpresin nxënës dhe studentë të çdo moshe.
“Shkolla duhet të jetë e hapur për një ritëm të ri jete. Duhet të jetë një vend aktiv gjatë të gjitha orëve të ditës, çdo ditë të vitit, për të gjithë, për të gjitha mosha: gjyshërit, të rinjtë, shoqatat vendore, ndërmarrjet krijuese, institucionet. Shkolla e hapur i hap dyert atyre që kërkojnë një hapësirë për të nisur një sipërmarrje sociale dhe kulturore. Mirëpret klubet e librit dhe organizon kruse për të eksploruar thellësitë më intriguese, të çuditshme dhe ekstreme të njohurisë”, shprehet Stefaon Boeri.
Tre godinat e reja do të kenë fasada me tulla të kuqe dhe bazë cemento në ngjyrë të bardhë, një kombinim materialesh që na rikthen në traditën e arkitekturës italiane në Tiranë.
Kompleksi i Shkollës Don Bosko do të ketë një çerdhe, kopësht, arsim parashkollor, arsim 9-vjeçar dhe gjimnaz për një total prej 9,812 metrash katrorë. Në të njëjtën mënyrë do të organizohen edhe Kompleksi i Shkollës Kodër-Kamëz me hapësirë 11,898 m2 dhe Kompleksi i Shkollës Shqiponja me hapësirë 7,898 m2.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.