FOTO/Një tjetër korsi biçikletash në kryeqytet, përfundon ndërtimi në Bulevardin “Zogu I”
Bulevardi “Zogu I” ka marrë një tjetër fytyrë. Ai tashmë ka edhe një korsi biçikletash, e ndërtuar nga Bashkia e Tiranës, pjesë e një projekti prej 10 kilometrash korsi në kryeqytet. Kryebashkiaku Veliaj gjatë inspektimit të punimeve tha se ky është vetëm fillimi i një projekti që do të vazhdojë të shtrihet edhe më tej.
“Më në fund shohim dallëndyshen e parë të projektit prej 10 km korsi. Ky është segmenti i parë, më shumë sesa 1 km, në të gjithë gjatësinë e Bulevardit ‘Zogu I’, një rrugë ekskluzive, ndoshta rruga më romantike për biçikletat, e rrethuar nga pemë, e mbrojtur nga makinat, si kurrë më parë në Tiranë. Sigurisht, korsia do të lidhet më pas edhe me Bulevardin e Ri, ndërsa nga ana tjetër, kemi sheshin “Skënderbej”, një hapësirë të madhe pedonale për biçikletat. Mandej, do të vijojmë me korsitë e Unazës së Vogël, për të vijuar në Bulevardin “Dëshmorët e Kombit”, ku siç e keni parë, jemi duke vendosur trafikndarëset e kuqe, për një korsi ekskluzive biçikletash”.
Veliaj tha se brenda një kohe të shkurtër, synohet që Tirana të ketë një rrjet minimal korsish të mbrojtura për biçikletat, çka natyrisht do të nxisë edhe më shumë përdorimin e tyre në kryeqytet.
“Duam që brenda pranverës të kemi 10 km rrjet minimal korsi biçikletash, pra një rrjet të lidhur nga fillimi deri në fund për pjesën qendrore të Tiranës. Me ardhjen e 4 mijë biçikletave të reja në Tiranë, prej projektit që kemi me Bashkinë e Firences, qytetarët do mund ta përdorin atë më lirë se sa një biletë autobusi”.
Qytetarët duhet të respektojnë sinjalistikën për korsitë e dedikuara. Ndërsa për të ndërgjegjësuar ata do të angazhohen disa vullnetarë, theksoi Veliaj.
Korsia e biçikletave kalon në trotuarin e mesit në Bulevardin “Zogu I”, fillon në Unazën e Vogël dhe përfundon në Unazën e Mesme në veri. Korsia e biçikletave ka një gjatësi rreth 1.2km vajtje-ardhje dhe gjerësi 2.5 m, me dy sense lëvizjeje.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.