FOTOT- Drejt inaugurimit statuja më e lartë në botë, dy herë më e madhe se statuja e Lirisë! Ka muze dhe qendër argëtimi

India po bëhet gati të zbulojë për publikun atë që do të jetë statuja më e lartë në botë. Statuja ka figurën e Sardar Vallabhbhai Patel, një lider politik dhe shoqëror që ishte pjesë e lëvizjes për pavarësi nga kolonializmi britanik në 1947. Ai është i njohur për lëvizjen paqësore dhe ka qenë zëvëndëskryeministri i parë pas Pavarësisë . Statuja 182 metra, do të zbulohet me 31 tetor. “Kjo statujë do të jetë dy herë më e madhe se statuja e Lirisë në SHBA” ka deklaruar më herët kryeministri i Indisë Narendra Modi. Statuja e Lirisë në fakt është 93 metra, sëbashku me piedestalin.

Projekti ambicioz u njoftua në vitin 2010 nga Modi kur ai ishte administrator i Gujaratit.

Kostoja e kësaj statuje llogaritet mbi 400 milion dollarë dhe komiteti organizator ka kërkuar edhe donacione publike për të realizuar fondet e nevojshme. Thirrjet arritën deri në atë pikë sa edhe fermerëve iu kërkua të dhurojnë hekur. E promovuar si një ëndërr që Modi është i angazhuar që ta realizojë në mandatin e tij të parë si kryeministër, projekti përfshin një muze, një qendër kërkimore dhe një qendër argëtimi. Një hotel me 3 yje është ndërtuar gjithashtu në një kompleks aty pranë.

Modi pritet që ta inaugurojë statujën javën e ardhshme në një ceremoni madhështore ku do të marrin pjesë zyrtarë të lartë partiakë dhe liderë qeveritarë.

Por kjo nuk është statuja e vetme që pritet të vendosë rekord botëror pasi një statujë tjetër po ndërtohet paralelisht afër Mumbait dhe që i dedikohet luftëtarit të famshëm Shivaji.

Kjo statujë parashikohet të arrijë lartësinë 212 metra, e kjo statujë mund të tejkalojë edhe projektin e ëndrrave të kryeministrit Modi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.