FOTOT/ Sekuestrohen 140 thasë me rroba, 9 televizorë dhe sende të tjera shtëpiake. Shpallen në kërkim 4 persona, 2 prej tyre doganierë
Sekuestrohen një sasi mallrash që po hynin kontrabandë në pikën e Kalimit Kufitar të në Qafë Botë. Konkretisht policia ka sekuestruar rreth 140 thasë me veshje, 9 televizorë dhe sende të tjera shtëpiake si i lavatriçe, dollapë, dyshekë, tapete etj. Operacioni u krye nga Departamenti i Kufirit dhe Migracionit në Policinë e Shtetit, në bashkëpunim me Policinë Kufitare Sarandë dhe Policinë e Sarandës, nga ku u shpallën në kërkim 4 shtetas, 2 prej tyre doganierë.
“Është sekuestruar mjeti kamion tip ”Benz” me të cilin bëhej kalimi i mallrave në Shqipëri, gjithashtu në brendësi të kamionit janë sekuestruar nga Policia në cilësinë e provës materiale rreth 140 thasë me veshje, 9 televizorë, si edhe sende shtëpiake si lavatriçe, dollapë, dyshekë, tapete etj.
Si autor të kësaj veprimtarie të kundraligjshme kanë rezultuar shtetasit: K.S., S.M., (shoferë të kamionit) dhe A.C., E.D., (doganier në PKK Qafë-Botë), që kanë bashkëpunuar dhe kanë lejuar kalimin dhe futjen e këtyre mallrave pa i deklaruar në Pikën e Kalimit të Kufirit shqiptar.
Të katërt shtetasit e përfshirë në këtë veprimtari të paligjshme janë shpallur në kërkim pasi janë larguar në momentin kur kanë kuptuar se Policia po zhvillonte një hetim dhe u ishte vënë në ndjekje”, thuhet në njoftimin e policisë.
Uniformat blu pohojnë se po vijon puna për kapjen dhe ndalimin e shtetasve të shpallur në kërkim si edhe për zbardhjen dhe dokumentimin ligjor për të tjera raste të veprimtarisë kriminale të kontrabandës.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.