Fotovoltaikët, ‘peng’ i akteve nënligjore! Investitorët, letër Ballukut: S’hedhim dot energjinë në rrjet, afatet janë tejkaluar

Mbi 20 investitorë që operojnë në sektorin e energjisë së prodhuar nga fotovoltaikët i kërkojnë ministres së Infrastrukturës dhe Energjisë, Belinda Balluku të miratojë aktet nënligjore që po mbajnë peng zbatimin e ligjit “Për nxitjen e Përdorimit të Energjisë nga Burimet e Rinovueshme”.

Ata i referohen nenit 15 të ligjit, i cili rregullon skemën e matjes neto të energjisë, ndërkohë që udhëzimet përkatëse do të duhej të kishin dalë brenda vitit 2018.

Në shkresën zyrtare, dërguar Ballukut dhe ministrit për Mbrojtjen e  Sipërmarrjes, Eduard Shalsi ata argumentojnë se  “tejkalimi i afateve në miratimin e këtij udhëzimi është shndërruar në pengesë evidente për zbatimin e plotë të nenin 15, i cili i jep të drejtën çdo konsumatori të prodhojë energji elektrike nga burime të rinovueshme, kryesisht për nevoja autokonsumatore si dhe të ketë mundësi të shkëmbejë tepricën e prodhuar në rrjetin elektrik publik”.

Por, në kushtet aktuale, të gjitha investimet që janë bërë për këto impiante fotovoltaike funksionojnë vetëm për të plotësuar një pjesë të nevojave vetjake për energji dhe teprica e energjisë së prodhuar “humbet” ose në rastin më të keq i faturohet auto konsumatorit si konsum i energjisë elektrike.

“Kjo vonesë e pajustifikuar po sjell një dëm ekonomik për bizneset dhe konsumatorët që kanë kryer këto investime me financimin e  tyre personal, por edhe frenim të investitorëve seriozë në këtë sektor me potencial për zhvillimin ekonomik të vendit dhe krijimin e vendeve të reja të punës”,-theksohet në shkresë.

Deri më tani autoritetet shtetërore kanë argumentuar se rrejti i shpërndarjes së energjisë elektrike nuk ka kapacitete për të përballuar energjinë  e prodhuar nga fotovoltaikët dhe do të nevojiteshin investime të mëdha në këtë drejtim. Por, kjo është hedhur poshtë nga investitorët, të cilët kanë shpjeguar se teknologjia e fotovoltaikëve lejon përshtatjen automatike me rrjetin.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.