Franca bëhet vendi i parë në BE që provon ‘certifikatën dixhitale të vaksinës Covid’ – Shpresa për lehtësimin e udhëtimit

Franca është bërë shteti i parë anëtar i BE që fillon testimin e një çertifikate dixhitale të udhëtimit koronavirus si pjesë e një skeme në të gjithë Evropën që Brukseli shpreson të lejojë njerëzit të udhëtojnë më lirshëm brenda bllokut deri në verë.

Aplikacioni TousAntiCovid është azhurnuar për të ruajtur rezultatet negative të testit Covid-19 në celularët e udhëtarëve dhe po provohet në fluturimet për në Korsikë dhe vendet e huaja nga kjo javë.

Prova do të zgjatet nga 29 Prill për të përfshirë certifikatat e vaksinimit, thanë zyrtarët për Le Monde, dhe sistemi përfundimisht mund të miratohet për ngjarje publike të tilla si koncerte, festivale dhe panaire tregtare, megjithëse jo për bare dhe restorante.

Prova franceze do të formojë një pjesë të një sistemi “të përforcuar, të konsoliduar dhe të standardizuar” në të gjithë Evropën, tha ministri për tranzicionin dixhital, Cédric O, me bisedimet tashmë në proces me disa vende dhe linjat ajrore për të siguruar njohjen e hershme.

Komisioneri Evropian për drejtësinë, Didier Reynders, tha javën e kaluar ai priste që “certifikata e gjelbër dixhitale” e BE të funksiononte deri në 21 qershor. Certifikata është një përparësi urgjente për vendet anëtare të Evropës Jugore, ekonomitë e të cilave janë shkatërruar nga pandemia.

Skema qëllimisht nuk është quajtur “pasaportë e vaksinës” për të shmangur diskriminimin ndaj njerëzve që nuk u është ofruar ende një vaksinë. Brukseli ka theksuar se ndërsa duhet të bëjë më të lehtë udhëtimin, certifikatat nuk duhet të bëhen një parakusht për lëvizjen e lirë.

D.B – SCAN
Burimi: The Guardian

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.