Franca do të mbetet pas Eurozonës – Banka Qendrore pret një rritje me 1.6% në dy vitet e ardhshme
Ekonomia e Francës pritet të rritet me 1.6% me bazë vjetore deri në vitin 2020, ndërkohë që papunësia ka rënë në mënyrë të qëndrueshme, sipas projeksioneve të Bankës Qendrore. Banka e Francës priste një rritje me 1.8% në vitin 2018 dhe me 1.7% në 2019-ën, por shtoi se gjysma e parë e këtij viti rezultoi në performancë më të dobët se ç’parashikohej dhe kërkesa e brendshme projektohet në ngadalësim.
Me përditësimin e perspektivës, Banka Qendrore është më pesimiste se Qeveria, që e ka bazuar buxhetin e vitit 2018 në supozimin se ekonomia do të rritet me 1.7% këtë vit edhe tjetrin. Perspektiva tregon gjithashtu se Franca ka gjasa të mbetet pas mesatares së Eurozonës, ndërkohë që Banka Qendrore Europiane bëri të ditur këtë javë se ekonomia e bllokut do të rritet me 2% këtë vit, 1.8% në 2019-ën dhe 1.7% pas dy vitesh.
Guvernatori i Bankës së Francës, Francois Villeroy, tha se Franca është ende mbrapa për shkak të mos përshpejtimit të reformave. Në perspektivën e Bankës Qendrore, norma e papunësisë pritet të bie në mënyrë graduale nga 9,1% në tremujorin e dytë, në 8.3% deri në fund të vitit 2020, që është më e ulëta që prej fundit të 2008-ës. Ndërkohë që papunësia bie dhe fuqia blerëse e ekonomive familjare shtohet, shpenzimet konsumatore pritet të rriten në vitet e ardhshme, duke kompensuar rënien e investimeve nga bizneset.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.