Franca rifiton respektin – Deficiti publik brenda rregullave të BE për herë të parë që prej 2007
Deficiti publik i Francës ka zbritur nën 3% të PBB për herë të parë në një dekadë, duke u futur kështu në binarët e rregullave të Bashkimit Europian, ashtu siç kishte premtuar vazhdimisht Emmanuel Macron, presidenti francez, edhe gjatë fushatës së tij elektorale.
Macron është një ithtar i Europës së bashkuar dhe rregullave të përbashkët si një ndër elementët kyç që e bën të shkojë përpara këtë union.
Në këtë mënyrë, Macron rikthen kështu besueshmërinë financiare të vendit në Bruksel.
“Sot, kur Presidenti të flasë në Bruksel do të dëgjohet dhe respektohet më shumë”-deklaroi Ministri i Financave Bruno le Maire. Madje, deficiti buxhetor i vendit ka zbritur në 2.6% të PBB në 2017, edhe përtej parashikimeve të qeverisë, që flisnin për vetëm 2.9%.
Kjo është shifra më optimiste që prej krizës financiare globale të vitit 2007. Masat e ndërmarra për të ulur deficitin mjaft të lartë publik i kanë kushtuar Macron edhe humbje të ndjeshme të popullaritetit të tij.
Financat publike të Francës janë shëndoshur edhe për shkak të mbledhjes më të mirë të taksave. Barra e taksave ndërkohë është rritur në 45.4%, nga 44.6% që ishte në vitin paraardhës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.