Franca ul kufirin e shpejtësisë në 80 km/h – Ja limitet për të gjithë rrugët e Europës

Ditën e diel, Franca ka ulur kufirin e shpejtësisë së lejuar për rrugët interurbane me dy korsi në 80 kilometra në orë, nga 90 km/h, duke iu bashkuar shteteve europiane që aplikojnë limite të tilla të ulëta.

Në Europë, limiti për këto rrugë varion nga 70 km/h deri në 100 km/h. Ashtu si Shqipëria, limitin prej 90 km/h e zbatojnë edhe Kroacia, Greqia, Hungaria, Italia, Luksemburgu, Maqedonia, Portugalia, Sllovakia, Sllovenia, Spanja, shtetet baltike dhe Çekia.

Ndërkohë, në Gjermani shpejtësia e lejuar për këto rrugë është 100 km/h. Ndërsa në autostrada nuk ka vendosur limit, por llogaritet që drejtuesit e automjeteve të lëvizin me një shpejtësi mesatare prej 120 km/h.

Një shpejtësi shumë e lartë lejohet edhe në Poloni, ku limiti në autostrada është 140 km/h.

Austria zbaton kufij prej 100 km/h për rrugët interurbane dhe 130 km/h për autostradat. Britania ka një shpejtësi maksimale prej 60 miljesh në orë (96.6 km/h) dhe 70 mph në autostradë.

Shtetet më strikte

Suedia nuk i preferon shpejtësitë e larta dhe kufiri në rrugë jashtë zonave urbane është 70 km/h, ndërsa në autostrada vetëm 110 ose 120 km/h.

Por kufijtë e shpejtësisë shpesh merren edhe si masa ndaj vdekshmërisë së rrugëve. Gjermania, Britania dhe Irlanda janë në krye kur vjen puna te siguria rrugore, me përkatësisht 4.2, 2.8 dhe 3.5 vdekje për 100 mijë banorë.

Ndërkohë, shtetet europiane me vdekshmërinë më të lartë janë Rumania dhe Bullgaria me 9.6 dhe 9.9 vdekje për 100 mijë banorë. Të dyja vendet zbatojnë kufij shpejtësie prej 90 km/h në rrugë interurbane dhe 130 km/h në autostrada.

Edhe Serbia paraqet një numër të lartë vdekjesh në rrugë, për shkak se kufiri i shpejtësisë shpesh nuk respektohet. Në rrugë kombëtare Serbia aplikon një limit prej 80 km/h, ndërsa në autostrada ajo e ka rritur së fundmi shpejtësinë në 130 km/h nga 100 km/h, për t’iu përshtatur limiteve të shteteve fqinje.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.