Franga bie poshtë 1.20 për euro – Kalon kursin minimal të braktisur përpara 3 vitesh
Franga ka rënë poshtë nivelit prej 1.20 kundrejt euros, që është kursi minimal i braktisur përpara 3 vitesh, duke lehtësuar punën e Bankës Qendrore të vendit.
Ditën e fundit tregtare të kësaj jave, franga ra poshtë 1.20 për euro për të parën herë që prej Janarit 2015, kur banka qendrore e braktisi papritur përpjekjet për të përmbajtur valutën në një nivel që shihej si i nevojshëm për të mbështetur inflacionin dhe rritjen ekonomike.
Analistët e këmbimit valutor kanë shumë teori për rënien e fundit të frangë. Një prej tyre është se banka qendrore do të vazhdojë të mbajë normat e interesit poshtë zeros për një kohë më të gjatë se institucionet e tjera, përfshirë Bankën Qendrore Europiane.
Një tjetër faktor është se disa investitorë po shqetësohen ndaj një referendumi të projektuar më datë 10 Qershor mbi sovranitetin e parasë. Mbështetësit e kësaj ideje kërkojnë që banka qendrore të jetë enti i vetëm që krijon para elektronike, me bankat private që të kufizohen vetëm te huadhënia.
Një tjetër teori është prej tensionit mes Perëndimit dhe Rusisë, gjë që ka sjellë tërheqjen e parasë së miliarderëve rusë nga bankat zvicerane.
Sipas të dhënave të Bankës së Rusisë për 2017, 14% e totalit të transfertave të parasë përtej kufijve janë bërë drejt Zvicrës.
Pavarësisht arsyes, zhvlerësimi i frangës do të ndihmojë në rritjen e inflacionit nëpërmjet çmimeve në import. Kjo pritet të lehtësojë politikëbërësit e një vendi ku objektivi i nivelit të çmimeve nuk pritet të arrihet në të ardhmen e afërt.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.