Franga i afrohet nivelit të 2015 – Bie në 1.19 ndaj euros, pranë nivelit minimal të “braktisur” 3 vite më parë

Franga zvicerane preku  këtë javë nivelin më të ulët në 3 vite, në 1.19 kundër euros, duke i’u afruar kufirit prej 1.20 që Banka Qendrore e Zvicrës braktisi në fillim të vitit 2015.

Edhe pse niveli në 1.20 kundër euros është më shumë simbolik, zhvlerësimi i frangës përbën një lehtësim për politikëbërsit e Bankës Qendrore, duke i lënë hapësirë që të diskutojnë për kthimin e normave të interesit në territor pozitiv,   pas një dekadë të politikave monetare të jashtëzakonshme.

Institucioni ka reduktuar ndërhyrjet në tregun e këmbimit valutor,  ndërkohë që franga ka rënë prej fuqizimit të ekonomisë së Eurozonës dhe largimit të shqetësimeve nga investitorët për politikat europiane.

Ndërhyrjet e bankës në vitin 2017 prekën vlerën e 48 miliardë franga,  krahasuar me 86 miliardë në vitin 2015, ku u braktis kursi minimal prej 1.20 franga për euro, gjë që shkaktoi trazira në tregje.

Banka Qendrore ka ndryshuar komunikimin në lidhje me valutën, megjithatë, presidenti i institucionit, Thomas Jordan, tha në javën e kaluar se ka ende pasiguri në tregjet financiarë dhe se është shumë herët për të tkurrur politikat monetare.

Valuta mund të dobësohet mëtej, ndërkohë që përfundon programi i blerjes së obligacioneve i Bankës Qendrore Europiane. Kjo do t’i lë hapësirë politikëbërësve në Zvicër që të rrisin normën e interesit nga niveli rekord i ulët prej -0.75%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.