“Frenon” kalimi drejt privatit – PISA: Por, shkollat private në Shqipëri me performancë 50% më të lartë

Në vitin 2000, vetëm 3.8% e nxënësve në vendin tonë ishin në shkolla private, ndërsa në 2018-ën, kjo normë është ngjitur në 11.2%, thonë të dhënat më të fundit të OECD në raportin PISA. Sipas këtyre të dhënave, Shqipëria është ndër vendet e para në botë, e 7-ta ndër vendet e analizuara, sa i përket tranzicionit nga shkollat publike drejt atyre private.

Por, pavarësisht kësaj, tendenca është përmbysur gjatë viteve të fundit. Krahasuar me raportin e kaluar, atë që i referohet vitit 2015, vihet re një rritje e përqindjes së nxënësve në shkollat publike, nga 88.5% në vitin 2015, në 88.8% në 2018-ën. Por, ajo që shqetëson është diferenca mjaft e madhe mes performancës së nxënësve në shkollat publike dhe ato private.

Në këto të fundit, performanca është ndjeshëm më e lartë, me nxënësit që kanë rezultate deri në 50% më të larta, thotë raporti, që e klasifikon Shqipërinë ndër vendet me hendekun më të mdh në këtë drejtim. Vetëm Polonia, Greqia, Malta dhe Sllovenia kanë një hendek më të madh se vendi ynë, në kontinentin e vjetër, thonë shifrat në raport.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.