Frika e sipërmarrësve shqiptarë – Raporti i WEF, kriza fiskale rreziku kryesor, ndjek tregtia e paligjshme

Forumi Ekonomik Botëror radhit krizat fiskale si rrezikun numër një të ekonomisë shqiptare. Këto përfundime dalin në raportin më të fundit të rreziqeve globale të Forumit Ekonomik Botëror që analizon 140 ekonomi të botës, me titull: “Rreziqet rajonale në të bërit biznes”. Një krizë fiskale është rrjedhojë e paaftësisë së shtetit për të balancuar të ardhurat me shpenzimet. Rreziku numër dy për të cilin flet Forumi Ekonomik Botëror është tregtia e paligjshme.

Në vend të tretë ndërkohë radhitet dështimi i mekanizmave apo institucioneve financiare. Në vend të katërt, si rrezik që mund t`i kanoset ekonomisë shqiptare është konflikti ndërshtetëror dhe në vend të pestë renditet katastrofa natyrore së bashku me sulmet kibernetike.  Ndërkohë që për fqinjët rreziqet kryesore radhiten papunësia dhe migrimi në shkallë të gjerë, në Shqipëri frikërat duket se janë në terma makro.

Duhet saktësuar fakti se, këto rreziqe janë ato që perceptojnë vetë sipërmarrësit shqiptarë, pasi publikimi vjen në formën e një anketimi, ku në pyetje janë marrë sipërmarrës relativisht të rëndësishëm. Këta të fundit duket se kanë zgjedhur pikërisht krizën fiskale si frikën e tyre më të madhe edhe pse është kryesisht veçori e vendeve në probleme të rënda financiare.

Pavarësisht se indikatorë të ndryshëm nuk sinjalizojnë aspak mundësinë e një krize të mundshme fiskale, përkundrazi, flasin për financa të shëndosha, kjo frikë është disi e bazuar. Një sërë institucionesh  të ndryshme ndërkombëtare, si FMN, BB, apo edhe Komisioni Europian kanë folur për rrezikun fiskal që buron nga skemat e Partneritetit Publik Privat.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.